ភ្នំពេញ៖ គ្រឹះស្ថានមធ្យមសិក្សា ឬវិទ្យាល័យរបស់រដ្ឋមួយចំនួននៅរាជធានីភ្នំពេញ ​និងបណ្ដាខេត្ត កំពុង​ពង្រីកការបង្រៀនសិស្សអំពីការអប់រំឌីជីថលឱ្យមានគុណភាព ស្របតាមយុទ្ធនាការគាំទ្រ​ការអប់រំឌីជីថលរបស់ក្រសួងអប់រំយុវជន និងកីឡា ដែលបានដាក់ចេញកាលពីពេលថ្មីៗនេះ ដើម្បីបង្រៀនសិស្សឲ្យមានគុណភាពស្របតាមយុគសម័យឌីជីថលទំនើបរបស់ពិភពលោក។

លោក ថុល ចាន់ថន គ្រូប្រចាំថ្នាក់ឌីជីថល នៃវិទ្យាល័យហ៊ុន សែន សេរីភាព នៅក្រុងតាខ្មៅ ខេត្តកណ្តាល ថ្លែងប្រាប់ BTV នៅថ្ងៃទី ១១ ខែកក្តដានេះ ថា បច្ចុប្បន្ន នៅក្នុងវិទ្យាល័យហ៊ុន សែន សេរីភាព ​មានថ្នាក់រៀន ​និងបង្រៀនតាមបែបឌីជីថលនេះ​ ច្រើនបន្ទប់ ដែលអាចឲ្យសិស្ស​រៀនតាមបែប E-Learning តាមបែបឌីជីថលនេះបាន និងទៅតាមម៉ោង ឬតាមកម្មវិធីសិក្សារបស់​សាលា និងស្របតាមគោលការណ៍ណែនាំរបស់ក្រសួងអប់រំយុវជន និងកីឡា បាន​កំណត់ឲ្យអនុវត្ត។

សិស្សានុសិស្ស ដែលបានរៀននៅក្នុងថ្នាក់ឌីជីថល​បាននិយាយថា ​ពួកគេ រីករាយណាស់​ដែល​សាលារៀនរបស់រដ្ឋមានថ្នាក់ឌីជីថល​បែបនេះ​ ហើយការរៀនបែបឌីជីថលពួកគេឆាប់យល់ ងាយស្រួល​ស្រាវជ្រាវ​ និងធ្វើលំហាត់ផ្សេងៗជាដើម។

លោក ផុន វុត្ថា មន្ត្រីកម្មវិធីយុវជន អង្គការ UNFPA ​នៃអង្គការសហប្រជាជាតិ ​បានវាយតម្លៃថា ប្រព័ន្ធអប់រំ​នៅកម្ពុជា បច្ចប្បន្នគឺបានដើរទាន់យុគសម័យឌីជីថល​ ជាពិសេសនោះ នៅក្នុងអំឡុង​ពេលដែលកម្ពុជា ជួបវិបត្តិកូវីដ១៩ កាលនោះទោះបណ្តាសាលារៀនរដ្ឋបានបិទទ្វារ ប៉ុន្តែគ្រូ និង​សិស្សនៅតែអាចបន្តការបង្រៀន និងរៀនបានជាធម្មតានៅតាមប្រព័ន្ធអនឡាញឌីជីថល។

សូមជម្រាបថា នៅក្នុងដំណើរការអនុវត្តយុទ្ធនាការ​យុទ្ធនាការ​គាំទ្រការអប់រំឌីជីថល​សម្រាប់​សិស្សានុសិស្សថ្នាក់ទី១០ ​ដល់ថ្នាក់ទី១២ ​សម្រាប់គ្រឹះស្ថានមធ្យមសិក្សា ​របស់ក្រសួងអប់រំ ត្រូវបាន​ចាប់ផ្តើមអនុវត្តចាប់ពីខែកក្កដាឆ្នាំ ​២០២៣នេះ ​តទៅលើប្រធានបទចំនួន ៦ រួមមាន៖ ទី១. ការស្វែងយល់​ពីវិធីការរៀន ២. ការរៀនដោយស៊ីជម្រៅ ៣. ​ការរៀនតាមបែបពន្លឿន ៤. ការបង្កើត​ក្លឹប​សម្រាប់សិស្សរៀនយឺត ៥. ​ការបំប៉នសមត្ថភាពប្រឡង ​និង ទី៦.​ ការប្រើប្រាស់កម្មវិធីទូរសព្ទ ឬទូរសិក្សា៕អត្ថបទ ស៊ុម សុខជា