ភ្នំពេញ៖ មន្ត្រីជាន់ខ្ពស់ក្រសួងផែនការ បានឱ្យដឹងថា ដោយសារការផ្លាស់ប្ដូរ នៃ​កត្តា​ជីវភាព និង​មានសុខភាពបានធ្វើឱ្យអាយុសង្ឃឹមរស់របស់ប្រជាពលរដ្ឋខ្មែរមានការកើនឡើង ដល់ប្រមាណ៧៥ឆ្នាំ មកដល់ពេលបច្ចុប្បន្ននេះ ។

ប្រទេសកម្ពុជានៅថ្ងៃនេះ បានប្រារព្ធទិវាប្រជាជនពិភពលោក ១១ កក្កដា លើកទី៣៤​ ក្រោម​ប្រធាន​បទ «ការបញ្ចេញអានុភាពនៃសមភាពយេនឌ័រ៖ ​ការជ្រោងឡើងនូវសំឡេងស្រ្តី ​និងក្មេងស្រី ​ដើម្បី បង្ហាញ​ពីលទ្ធភាពគ្មានដែនកំណត់ ​នៃពិភពលោកយើង‍» ។

ពិធីនេះប្រារព្ធធ្វើឡើងនៅមជ្ឈមណ្ឌល​សហប្រតិបត្តិការកម្ពុជា-កូរ៉េ ក្រោមអធិបតីភាព​ឯកឧត្តមកិត្តិសេដ្ឋា​បណ្ឌិត ឆាយ ថន ​ទេសរដ្ឋមន្ត្រី រដ្ឋមន្ត្រី ​ក្រសួងផែនការ ដោយ​មានការ​អញ្ជើញ​ចូលរួម​ពីសំណាក់លោក លោកស្រី និសិ្សត តំណាងដៃគូអភិវឌ្ឍន៍ជាតិ ​និងអន្តរជាតិជាដើម ។

ឯកឧត្តមបណ្ឌិត ប៉ូច ប៊ុណ្ណាក់​ រដ្ឋលេខាធិការក្រសួងផែនការ​ បានឱ្យដឹងថា​ អាយុសង្ឃឹម​ រស់របស់ ប្រជាជនកម្ពុជា​ មានការកើនឡើងជាលំដាប់​ គឺ៥៤ឆ្នាំ ​សម្រាប់​បុរស​ និង៥៨ឆ្នាំ ​សម្រាប់​ស្ត្រី​ នៅ ឆ្នាំ​១៩៩៨, ៦១ឆ្នាំ ​សម្រាប់​បុរស និង៦៤ឆ្នាំ ​សម្រាប់​ស្ត្រី នៅឆ្នាំ២០០៨​ ហើយនៅឆ្នាំ២០២៣ ​អាយុ​សង្ឃឹម​រស់​របស់​ពលរដ្ឋខ្មែរ បានកើនឡើងដល់ប្រមាណ៧៥ឆ្នាំ ​ដោយ​កក្តាជីវភាព និងមាន​សុខាភាពល្អ ជាដើម ។

ឯកឧត្តម ឆាយ ថន រដ្ឋមន្ត្រីក្រសួងផែនការ បានមានប្រសាសន៍ថា ប្រធានទបទនៅឆ្នាំនេះ ពិតជា មាន​អត្តន័យដ៏ធំធេង​ ដែលឆ្លុះបញ្ចាំងអំពីស្ថានភាព ​ដែលឆ្លុះបញ្ចាំងអំពីស្ថានភាព ដែលពិភព​លោកបាន នឹងកំពុងជួបប្រទះ ជាមួយ​នឹងកាកើតមានវិសមភាពយេនឌ័រ, ភាពក្រីក្រ, បម្រែ​បម្រួលប្រជាសាស្រ្ត​ ដែល បញ្ហាទាំងនេះ កំពុងតែជះឥទ្ធិពលដល់ការអភិវឌ្ឍសង្គម-សេដ្ឋកិច្ច ។

ឯកឧត្តម បានបញ្ជាក់ថា ប្រជាជនកម្ពុជា មាននិន្នាការកើនឡើងពី១១,៤លាននាក់ នៅឆ្នាំ ១៩៩៨ ​ដល់ចំនួន១៣,៤លាននាក់ នៅឆ្នាំ២០០៨ និងកើនដល់ប្រមាណ១៧លាននាក់ នៅឆ្នាំ២០២២។ អត្រាមរណភាពមាតា និងកុមារ មានការថយចុះ និងអាយុសង្ឃឹមរស់មានការកើនឡើង ។

កម្ពុជាបានចាប់ផ្តើមប្រារព្ធទិវាប្រជាជនពិលោកលើកដំបូងនៅឆ្នាំ២០០៣ ​គឺជាឆ្នាំ ​ដែលរាជរដ្ឋាភិបាល បានប្រកាសដាក់អនុវត្តគោលនយោបាយជាតិប្រជាជនជាលើកដំបូង។ ការប្រារព្ធទិវាប្រជាជនពិភព ​លោកនៅកម្ពុជា ដោយផ្សារភ្ជាប់ទៅនឹងប្រធានបទតាមឆ្នាំនីមួយៗ​របស់សកលលោក ៕អត្ថបទ៖ ទូច សោភ័ណ