ភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដីនៃកម្ពុជា បានបញ្ជាក់បន្ថែម​តាមរយៈ​បណ្ដាញ​សង្គម Twitter នាល្ងាចថ្ងៃទី១១ ខែកក្កដា ឆ្នាំ២០២៣នេះថា ការបញ្ចេញរថយន្តក្រុង​សាធារណៈដឹក​ជញ្ជូនកម្មករ​និយោជិតនេះ គឺមិនរើសអើងអ្នកគាំទ្រគណបក្សនយោបាយណាមួយនោះទេ ដូច្នេះមិនមែន​ជាការទិញដូរ​សន្លឹកឆ្នោតឡើយ។

សម្ដេចតេជោបានសរសេរថា៖«ខ្ញុំបានចេញបទបញ្ជាសារជាសម្លេងឱ្យអភិបាលរាជធានីភ្នំពេញ បញ្ចេញរថយន្តក្រុង​សាធារណៈប្រមាណពី៣០០-៣៥០គ្រឿង ដើម្បីសម្រួលលើការដឹកជញ្ជូនកម្មករ​កម្មការិនីទៅបោះឆ្នោតជាតិ​ជ្រើសតាំងតំណាងរាស្រ្ត អាណត្តិទី៧ នៅតាមបណ្តាខេត្ត។ ខ្ញុំសូមបញ្ជាក់ឲ្យច្បាស់ថា ការដឹកជញ្ជូននេះ មិនរើស​អើងអ្នកគាំទ្រគណបក្សនយោបាយណាមួយនោះទេ ដូច្នេះមិនមែនជាការទិញដូរសន្លឹកឆ្នោតឡើយ»។

សម្ដេចតេជោបានបញ្ជាក់ថា៖«យើងដឹកគ្រប់និន្នាការនយោបាយ ហើយខ្ញុំបានស្នើឲ្យរៀបចំចំនួនរថយន្តឲ្យបានច្បាស់ ថាខេត្តណាតម្រូវការប៉ុន្មាន»។

សម្ដេចតេជោ បានបញ្ជាក់បន្ថែមថា ការដឹកជញ្ជូននេះទៀតសោតគ្មានយកថ្លៃនោះទេ ដូច្នេះសាលារាជធានីភ្នំពេញ​រៀបចំឲ្យមានអ្នកបើកបរ ឲ្យបានត្រឹមត្រូវ យកចិត្តទុកដាក់លើសុខុមាល​ភាពកម្មករកម្មការិនី។

សម្ដេចតេជោថ្លែងថា យន្តការនេះនឹងជួយកាត់បន្ថយដល់ការចំណាយរបស់កម្មករ-កម្មការិនី ដែលត្រូវធ្វើ​ដំណើរទៅបោះឆ្នោត៕ ដោយ ៖ វ៉ន ដារ៉ា