អគ្គលេខាធិការ លោក Jens Stoltenberg និយាយនៅថ្ងៃអង្គារនេះថា សម្ព័ន្ធយោធាណាតូ នឹងធ្វើឲ្យប្រាកដនៅក្នុងកិច្ចប្រជុំកំពូលរបស់ពួកគេ ក្នុងទីក្រុងវិលនីញូសពីរបៀបដែលអ៊ុយក្រែន អាចក្លាយជាសមាជិករបស់សម្ព័ន្ធនេះនៅពេលអនាគត។

ថ្លែងមុនពេលកិច្ចប្រជុំកំពូលនៃប្រមុខរដ្ឋនិងរដ្ឋាភិបាល របស់សមាជិក៣១ប្រទេសរបស់សម្ព័ន្ធនេះ លោក Stoltenberg និយាយថាការធានាបានសន្តិសុខទ្វេភាគីសម្រាប់ប្រទេសអ៊ុយក្រែន នឹងបំពេញបន្ថែមការសម្រេចចិត្តលើសមាជិកភាពរបស់ប្រទេសនេះសម្រាប់សម្ព័ន្ធណាតូ ដែលធ្វើឡើងអំឡុងកិច្ចប្រជុំកំពូល។

នៅពេលត្រូវបានសួរអំពីរុស្ស៊ី លោក Stoltenberg និយាយថា លោកពុំបានមើលឃើញការប្រែប្រួលក្នុងស្ថានការណ៍នុយក្លេអ៊ែររបស់រុស្ស៊ីនោះទេ ទោះបីជាការប្រកាសរបស់ប្រទេសនេះថា រុស្ស៊ីកំពុងដាក់ទីតាំងអាវុធនុយក្លេអ៊ែរ នៅក្នុងប្រទេសបេឡារុសក៏ដោយ។

លោកនិយាយថា សម្ព័ន្ធមិត្ត ពុំបានមើលឃើញសកម្មភាពណាមួយ របស់អ្នកប្រយុទ្ធរបស់ក្រុមហ៊ុនទាហានស៊ីឈ្នួល Wagner ទៅកាន់ប្រទេសបេឡារុសជាសម្ព័ន្ធមិត្តរបស់រុស្ស៊ីនៅក្នុងសង្គ្រាមរបស់ខ្លួនលើប្រទេសអ៊ុយក្រែននោះទេ។