រូបយន្តគិលានុបដ្ឋាយិកាដែលមានអវយវៈដែកវែង មានខ្សែ និងគ្មានមុខមាត់នេះត្រូវបានរចនាឡើងដោយក្រុមហ៊ុន Fourier Intelligence ដែលមានមូលដ្ឋាននៅទីក្រុងសៀងហៃ គឺជាផ្នែកមួយនៃកិច្ចខិតខំប្រឹងប្រែងរបស់ឧស្សាហកម្មបច្ចេកវិទ្យាដើម្បីដោះស្រាយជាមួយនឹងចំនួនប្រជាជនដែលមានវ័យចំណាស់។

លោក Zen Koh សហស្ថាបនិក និងជានាយកប្រតិបត្តិរបស់ក្រុមហ៊ុននេះមើលឃើញថា រូបយន្តគឺជាកត្តាជៀសមិនរួចក្នុងការប្រយុទ្ធប្រឆាំងនឹងកំណើនតម្រូវការសម្រាប់សេវាវេជ្ជសាស្រ្ត ខណៈពេលដែលការផ្គត់ផ្គង់អ្នកថែទាំមានតិចតួច។ បច្ចេកវិទ្យាវេជ្ជសាស្រ្តបានប្រើប្រាស់រូបយន្តដែលត្រូវបានរចនាឡើងដើម្បីទ្រដៃ និងជើងរបស់អ្នកជំងឺក្នុងការព្យាបាលរាងកាយ ហើយលោក Koh មើលឃើញថារូបយន្តដែលមានលក្ខណដូចមនុស្ស អាចបំពេញកង្វះចន្លោះដែលនៅមាន។

ទោះបីជាស្ថិតក្នុងដំណាក់កាលស្រាវជ្រាវ និងអភិវឌ្ឍន៍ក៏ដោយ លោក Koh សង្ឃឹមថាគំរូរូបយន្ត អាចរួចរាល់ក្នុងរយៈពេល២ទៅ៣ឆ្នាំ។ គោលដៅរបស់លោកគឺបង្កើតរូបយន្តដូចមនុស្សដែលអាចជួយគ្រាអ្នកជំងឺពីគ្រែទៅកាន់កៅអីរុញ ឬជួយលើកវត្ថុផ្សេងៗ។

គណៈកម្មាធិការសុខភាពជាតិរបស់ប្រទេសចិនរំពឹងថាក្រុមមនុស្សដែលមានអាយុចាប់ពី ៦០ឆ្នាំឡើងទៅនឹងកើនឡើងពី ២៨០លាននាក់ដល់ជាង ៤០០លាននាក់នៅឆ្នាំ២០៣៥។ យោងតាមរបាយការណ៍របស់អង្គការសហប្រជាជាតិ ប្រជាជនពិភពលោកដែលមានអាយុលើសពី ៦៥ឆ្នាំត្រូវបានព្យាករណ៍ថានឹងកើនឡើងពី១០% កាលពីឆ្នាំ២០២២ ដល់១៦% នៅឆ្នាំ២០៥០៕