ឧត្តមសេនីយ៍ឯក នេត វន្ថា ប្រធាននាយកដ្ឋាននគរបាលបង្ការ ពន្លត់អគ្គិភ័យ និងសង្គ្រោះនៃអគ្គស្នងការនគរបាលជាតិក្រសួងមហាផ្ទៃ បានបញ្ជាក់ជាថ្មីម្តងទៀតថា ក្រសួងមហាផ្ទៃ ក៏ដូចជាអគ្គស្នងការដ្ឋានគរបាលជាតិពុំ បានអនុញ្ញាតឲ្យនគរបាលដើរលក់បំពង់ពន្លត់អគ្គិភ័យនៅតាមផ្ទះប្រជាពលរដ្ឋនោះទេ តែអនុញ្ញាតឲ្យបន្ត ចុះអប់រំដល់ពលរដ្ឋនៅតាមផ្ទះ ស្តីពីហានិភ័យទាក់ទង និងគ្រោះអគ្គិភ័យនេះ។
ថ្លែងប្រាប់អ្នកសារព័ត៌មានក្រោយអញ្ជើញចូលរួមជាអធិបតីភាព ក្នុងពិធីធ្វើលំហាត់សមយុទ្ធពន្លត់អគ្គិភ័យ និងសង្គ្រោះ ជាក់ស្តែងដល់បុគ្គលិកអេអន១ នាព្រឹកថ្ងៃទី១២ ខែកក្កដា ឆ្នាំ២០២៣នេះ ឧត្តមសេនីយ៍ឯក នេត វន្ថា បានបញ្ជាក់ថា នាពេលកន្លងមកនេះនៅតែមានបងប្អូនប្រជាពលរដ្ឋComment តាមផេក នាយករដ្ឋានពន្លត់អគ្គិភ័យថា មានមន្រ្តីនគរបាលមួយចំនួនតូចនៅតែបន្តដើរលក់បំពង់ពន្លត់អគ្គិភ័យដល់ តាមខ្នងផ្ទះរបស់ប្រជាពលរដ្ឋ ខណៈការដើរលក់នេះគឺវាខុសនឹងច្បាប់របស់ក្រសួងក៏ដូចជាអគ្គស្នងការ ដូច្នេះក្នុងនាមលោកជាប្រធាននាយករដ្ឋាននគរបាល ក៏ដូចជាក្នុងនាមអគ្គស្នងការ សូមព្រមានដល់មន្រ្តី នគរបាលទាំងនោះឲ្យឈប់ជាបន្ទាន់ ដើម្បីកុំឲ្យបងប្អូនប្រជាពលរដ្ឋមានការថ្នាំងថ្នាក់បន្តទៀត។
ជាមួយគ្នានោះដែរឧត្តមសេនីយ៍ឯក នេត វន្ថា ក៏បានអំពាវនាវដល់បងប្អូនប្រជាពលរដ្ឋក៏ដូចជា តាមបណ្តាក្រុមហ៊ុននានាទាំងអស់ សូមឲ្យមានការប្រុងប្រយ័ត្នចំពោះបុគ្គលខ្លះដែលតាំងខ្លួនជាអ្នកជំនាញបង្ការ និងពន្លត់អគ្គិភ័យ ខណៈអ្នកជំនាញលុះត្រាណាមានលិខិតបញ្ជាក់ពីអគ្គស្នងការនគរបាលជាតិ ប្រធាននាយកដ្ឋានរបស់អគ្គស្នងការ ឬតាមបណ្តាស្នងការរាជធានី-ខេត្ត៕ អត្ថបទ៖ បាន ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
