ភ្នំពេញ៖ ឯកឧត្តមឧបនាយករដ្ឋមន្រ្តី  ប្រាក់ សុខុន រដ្ឋមន្រ្តីការបរទេស និងសហប្រតិបត្តិការ​អន្តរជាតិ នៃព្រះរាជាណាចក្រកម្ពុជា បានចែករំលែកនូវទស្សនថា ដោយហេតុ​អាស៊ាន​មាន​វប្បធម៌​សម្បូរ​បែប និងផ្នែកនយោបាយចម្រុះ ប្រទេសសមាជិក​អាស៊ាន​នីមួយៗ​មាន​យុទ្ធសាស្រ្ត​ពាក់ព័ន្ធ​ទៅ​នឹង​កិច្ចការសិទ្ធិមនុស្សផ្សេងៗគ្នា ក្នុងការជំរុញរបៀបវារៈសង្គម និងបរិបទរៀងៗខ្លួន។

ឯកឧត្តមឧបនាយករដ្ឋមន្ត្រី ប្រាក់ សុខុន បានបញ្ជាក់បែបនេះ ក្នុងឱកាស​ជំនួប​រវាង​រដ្ឋ​មន្រ្តីការ​បរទេស​អាស៊ាន​ជាមួយតំណាង នៃគណៈកម្មការអន្តររដ្ឋាភិបាលអាស៊ានស្តីពីសិទ្ធិមនុស្ស (AICHR) ​នាអំឡុងអញ្ជើញចូលរួមសម័យពេញអង្គនៃកិច្ចប្រជុំរដ្ឋមន្រ្តីការបរទេសអាស៊ាន លើកទី៥៦ កិច្ចប្រជុំគណៈ-កម្មការតំបន់អាស៊ីអាគ្នេយ៍គ្មានអាវុធនុយក្លេអ៊ែរ  នៅទីក្រុង​ហ្សាការតា នៅថ្ងៃទី១១ ខែកក្កដា ឆ្នាំ២០២៣ តបតាមការអញ្ជើញរបស់លោកជំទាវ រ៉េតណូ ម៉ារស៊ូឌី រដ្ឋមន្រ្តីការបរទេស នៃសាធារណរដ្ឋឥណ្ឌូនេស៊ី។

ក្នុងឱកាសជំនួបរវាងរដ្ឋមន្រ្តីការបរទេសអាស៊ានជាមួយតំណាងនៃគណៈកម្មការអន្តររដ្ឋាភិបាលអាស៊ាន​ស្តីពីសិទ្ធិមនុស្ស (AICHR) រដ្ឋមន្រ្តីការ​បរទេស​អាស៊ាន​បាន​កត់​សម្គាល់​លើ​របាយការណ៍​ប្រចាំ​ឆ្នាំ២០២៣ (ពីខែកក្កដា ឆ្នាំ២០២២ ដល់ខែកក្កដា ឆ្នាំ២០២៣) របស់ AICHR និងបាន​អនុម័ត​កម្ម​វិធី​ ឬសកម្មភាពអាទិភាពរបស់ AICHR ក្នុងឆ្នាំ២០២៤ ក្នុងគោលដៅពង្រឹង​កិច្ច​សហប្រតិបត្តិការ​រវាង​ប្រទេសសមាជិកអាស៊ាន ក្នុងការពង្រឹងដល់ការលើកកម្ពស់ និងកិច្ច​ការពារ​សិទ្ធិ​មនុស្ស នៅក្នុងតំបន់។

ឯកឧត្តមឧបនាយករដ្ឋមន្ត្រី ប្រាក់ សុខុន បានចែករំលែក​នូវ​ទស្សនថា «ដោយ​ហេតុ​អាស៊ាន​មាន​វប្បធម៌​សម្បូរបែប និងផ្នែកនយោបាយចម្រុះ ប្រទេសសមាជិ​កអាស៊ាន​នីមួយៗ​មាន​យុទ្ធ​សាស្រ្តពាក់​ព័ន្ធ​ទៅនឹងកិច្ចការសិទ្ធិមនុស្សផ្សេងៗគ្នា ក្នុងការជំរុញរបៀបវារៈសង្គម និងបរិបទរៀង​ៗ​ខ្លួន​»។

ឯកឧត្តមឧបនាយករដ្ឋមន្ត្រីក៏បាន ស្នើឱ្យ AICHR ពិចារណា​អំពីការ​រៀបចំ​ និង​បោះពុម្ព​របាយការណ៍​ប្រចាំ​ឆ្នាំ​ដែលចងក្រងសកម្មភាព និងកម្មវិធីនានាដែលអាស៊ាន និង​ប្រទេស​សមាជិក​អាស៊ាន​នីមួយៗសម្រេចបាន ក្នុងកិច្ចការពារនិងការលើកកម្ពស់សិទ្ធិមនុស្ស នៅ​ក្នុង​ប្រទេស​រៀងៗខ្លួន៕ អត្ថបទ៖ តារា