​ចិន៖ រដ្ឋមន្ត្រីការបរទេស​ចិន លោក Wang Yi បាន​អំពាវនាវ​ដល់​ក្រុម​​ប្រឹក្សា​សន្តិសុខ​អង្គការ​សហប្រជាជាតិ ស្វែងរកមធ្យោបាយភ្លាមៗ​បញ្ឈប់​អំពើ​ហិង្សា​រវាង​អ៊ីស្រាអែល និងបណ្ដា​មេដឹកនាំ​ក្រុម​ហា​ម៉ាស់​របស់​តំបន់​ហ្គា​ហ្សា​។ ​លោក​ក៏បាន​ស្ដីបន្ទោស​សហរដ្ឋអាមេរិក​ផង​ដែរ​ ចំពោះ​កង្វះ​ចំណាត់​ការ​របស់​ក្រុមប្រឹក្សា​នេះ​។

​ប្រមុខ​ការទូត​ចិន​រូប​នេះ​បាន​អំពាវនាវ​ដល់​សហរដ្ឋ​អាមេរិក​ ឲ្យ​កែប្រែ​ជំហរ​របស់​ខ្លួនលើ​ភាព​តានតឹង​រវាង​អ៊ីស្រាអែល និង​ប៉ា​ឡេ​ស្ទី​ន​។ លោក Wang Yi បាន​និយាយ​ថា​ យើង​សូម​បញ្ជាក់​ជាថ្មី​ពី​ការ​អញ្ជើញ​របស់​យើង​ ចំពោះ​ក្រុម​បង្កើត​សន្តិភាព​ពី​ភាគី​ប៉ា​ឡេ​ស្ទី​ន និង​អ៊ីស្រាអែល​ធ្វើដំណើរ​ទៅកាន់​ប្រទេស​ចិនសម្រាប់​កិច្ច​ចរចា និង​ស្វាគមន៍​ក្រុម​អ្នកចរចា​ប៉ា​ឡេ​ស្ទី​ន​ និង​អ៊ីស្រា​អែល​ក្នុង​ការ​រៀបចំ​កិច្ចពិភាក្សា​ដោយ​ផ្ទាល់​នៅ​ក្នុង​ប្រទេស​ចិន។

​ទីភ្នាក់ងារសារព័ត៌មាន​រដ្ឋ Xinhua បាន​ដកស្រង់​ស្ដី​របស់​លោក Wang ដែល​សន្ទនា​តាម​ទូរស័ព្ទ​កាល​ពី​ថ្ងៃ​សៅរ៍​ជាមួយ​រដ្ឋមន្ត្រីការបរទេស​ប៉ា​គី​ស្ថាន​ លោក Shah Mahmood Qureshi ថា គួរ​ឲ្យ​សោក​ស្ដាយ ​ក្រុមប្រឹក្សាសន្តិសុខ​ពុំបាន​ឈាន​ដល់​សម្រេច​បាន​កិច្ចព្រមព្រៀង ខណៈ​ដែល​សហរដ្ឋ​អាមេរិក​នៅ​តែ​ឈរ​លើ​ គោលការណ៍​បដិសេធ​លើ​យុត្តិធម៌​អន្តរជាតិ​៕

​អត្ថបទ៖ សុខមាន