ភ្នំពេញ៖ មជ្ឈមណ្ឌលវេជ្ជសាស្រ្ត Intercare នៅកម្ពុជា និងមជ្ឈមណ្ឌលវេជ្ជសាស្រ្ត Sunway មក​ពីប្រទេសម៉ាឡេស៊ី បានសហការគ្នាជំរុញកែលម្អសេវាថែទាំសុខភាពនៅកម្ពុជា។ កិច្ចសហការ​រួមគ្នានេះ នឹងផ្តោតលើការផ្តល់សេវាថែទាំសុខភាពជាស្តង់ដារអន្តរជាតិដល់ប្រជាជនកម្ពុជា។

លោក Jason Harrison អ្នកគ្រប់គ្រងទូទៅ នៃមជ្ឈមណ្ឌលវេជ្ជសាស្រ្ត Intercare បានមាន​ប្រសាសន៍​ថា រូបលោកជឿជាក់ថា ជាមួយនឹងការអនុវត្តតាមស្តង់ដារអន្តរជាតិ និងក្រមសីលធម៌ នឹងអាចផ្តល់ឱ្យប្រជាជន និងសង្គមកម្ពុជានូវសេវាវេជ្ជសាស្រ្តមានគុណភាពខ្ពស់។ លោកបន្តថា កម្ពុជាជាប្រទេសដែលមានចំនួនប្រជាជនកើនឡើង និងធនធានមានកម្រិត យើងជឿជាក់ថា កិច្ចសហការរួមគ្នានេះ នឹងជួយកែលម្អហេដ្ឋា​រចនាសម្ព័ន្ធ​ការលើកកម្ពស់​ប្រព័ន្ធ​ថែទាំ​សុខភាព​ក្នុងស្រុក ហើយថែមទាំងទទួលបាននូវការគាំទ្រពីអន្តរជាតិផងដែរ។ ប្រការនេះ នឹងធានាបានថា ប្រជាជន​កម្ពុជាទទួលបានការព្យាបាលប្រកបដោយគុណភាពកាន់តែប្រសើរឡើង។

អ្នកនាង Faith Tang ជំនួយការនាយកផ្នែកអភិវឌ្ឍន៍ពាណិជ្ជកម្មអន្តរជាតិ នៃមជ្ឈមណ្ឌល​វេជ្ជសាស្ត្រ Sunway បានបញ្ជាក់ថា យើងមានមោទនភាពក្នុងការធ្វើជាដៃគូជាមួយ Intercare នៅ​ក្នុងគំនិតផ្តួចផ្តើមដ៏សំខាន់នេះ។ អ្នកនាងបន្ថែមទៀតថា យើងអាច​បង្កើត​លទ្ធផល​ល្អ​លើ​សេវា​សុខភាព និងសុខុមាលភាពរបស់ប្រជាជនកម្ពុជា ហើយ​យើង​ទន្ទឹង​រង់ចាំ​ធ្វើ​ការ​ឆ្ពោះទៅ​រក​អនាគត​ដ៏​ត្រចះត្រចង់សម្រាប់ប្រទេសជាតិលើវិស័យវេជ្ជសាស្រ្ត។

តាមគណៈ​គ្រប់គ្រងមជ្ឈមណ្ឌលវេជ្ជសាស្រ្ត Intercare នៅកម្ពុជា និងមជ្ឈមណ្ឌលវេជ្ជសាស្រ្ត Sunway មកពីម៉ាឡេស៊ី បានរៀបចំពិធី​ចុះហត្ថ​លេខា​លើ​អនុស្សារណៈ​យោគយល់​គ្នា​លើ​កិច្ច​ព្រម​ព្រៀង​កិច្ច​សហប្រតិបត្តិការជាយុទ្ធសាស្រ្ត ព្រមជាមួយការរំពឹងទុកថា ភាពជាដៃគូនេះ នឹងពង្រីក​ជំនាញ​ផ្នែក​វេជ្ជសាស្រ្ដក្នុងប្រទេសកម្ពុជា និងម៉ាឡេស៊ី តាមរយៈមជ្ឈមណ្ឌលវេជ្ជសាស្រ្ត Sunway​៕ អត្ថបទ៖ បូរ៉ាវី