អាមេរិក ៖ ភាគហ៊ុនអាស៊ីបានឡើងខ្ពស់បន្តិចបន្តួច ហើយប្រាក់ដុល្លារអាមេរិក បានស្ថិតក្នុងកម្រិតទាបរយៈពេល ២ខែ នៅថ្ងៃពុធ (ទី១២ ខែកក្កដា) នេះ នៅមុនពេលមានទិន្នន័យអតិផរណាដ៏សំខាន់ៗរបស់សហរដ្ឋអាមេរិក ដែលនឹងជួយ​ធ្វើជារង្វាស់ថា តើធនាគារកណ្តាលសហព័ន្ធ កំពុងស្ថិតនៅចុងបញ្ចប់នៃគោលនយោបាយ​ដំឡើង​អត្រាការប្រាក់​ដ៏​គំហុក​របស់ខ្លួន ឬយ៉ាងណា។

ប្រាក់យ៉េនរបស់ប្រទេសជប៉ុន បានឡើងថ្លៃធៀបនឹងរូបិយប័ណ្ណធំៗភាគច្រើន ហើយចុងក្រោយនេះ គឺមានតម្លៃ ១៣៩,៤៣ ក្នុង ១ដុល្លារអាមេរិក ដែលនេះចាត់ទុកថា ជាតម្លៃខ្ពស់បំផុត ក្នុងរយៈពេល ១ខែ។

នាពេលនេះ ឃើញថា សន្ទស្សន៍ភាគហ៊ុនអាស៊ីប៉ាស៊ីហ្វិកដ៏ទូលំទូលាយរបស់ក្រុមហ៊ុន MSCI នៅខាងក្រៅប្រទេស​ជប៉ុន គឺឡើងខ្ពស់ ០,៦១ភាគរយ ខណៈដែលសន្ទស្សន៍ភាគហ៊ុន S&P/ASX 200 របស់អូស្ត្រាលីបានហក់ឡើង ០,៥៤​ភាគ​រយ។ ចំណែកភាគហ៊ុនរបស់ក្រុមហ៊ុន Nikkei របស់ជប៉ុន ធ្លាក់ចុះ ១ភាគរយ។

ក្រោមការស្ទង់មតិដោយទីភ្នាក់ងារសារព៏ត៌មាន Reuters ក្រុមសេដ្ឋវិទូរំពឹងថា សន្ទស្សន៍តម្លៃទំនិញប្រើប្រាស់ ដែល​គ្រោង​នឹងចេញផ្សាយ នៅល្ងាចថ្ងៃពុធនេះ នឹងកើនឡើង ៣,១ភាគរយ ក្នុងខែមិថុនា បន្ទាប់ពីឡើង ៤ភាគរយ នៅខែ​ឧសភា។ នោះជាដំណើរការមានកម្រិតទាបបំផុត ចាប់តាំងពីខែមីនា ឆ្នាំ២០២១។

មន្ត្រីរបស់ធនាគារកណ្ដាលសហព័ន្ធ (Fed) បានបង្ហាញថា ពួកគេរំពឹងថា នឹងមានការដំឡើង​អត្រាការប្រាក់យ៉ាងហោច​ណាស់​០,៥ ភាគរយទៀត ខណៈដែលពួកគេត្រូវទប់ទល់នឹងសម្ពាធដែលមានមកជាយូរហើយ។ សន្ទស្សន៍ប្រាក់ដុល្លារ ដែលជាវិធានវាស់រូបិយប័ណ្ណអាមេរិកធៀបនឹងរូបិយប័ណ្ណកម្រិតប្រហាក់ប្រហែលផ្សេងទៀត បានធ្លាក់ចុះ ០,១៩៧ភាគ​រយ នៅត្រឹម ១០១,៤០ ដោយបានធ្លាក់ចុះដល់កម្រិត ១០១,៣៧ ដែលជាកម្រិតទាបបំផុត ក្នុងរយៈពេល ២ខែ។

ភាគហ៊ុនរបស់ប្រទេសចិនបានធ្លាក់ចុះ ០,១៤ភាគរយ ខណៈដែលសន្ទស្សន៍របស់ក្រុមហ៊ុនអចលនទ្រព្យ Hang Seng របស់ហុងកុង បានឡើងខ្ពស់០,៥ភាគរយ នៅក្នុងការជួញដូរដំបូង៕