ភ្នំពេញ ៖ នៅឆ្នាំ២០២១នេះ អង្គការសុខភាពពិភពលោក បានកំណត់យកប្រធានបទ ការផ្តាច់បារី សម្រាប់ទិវាពិភពលោកគ្មានថ្នាំជក់។ ជាការឆ្លើយតបទៅនឹងការយាយីជាសកល នៃការផ្ទុះឡើងជំងឺកូវីដ១៩ និងក្រោមហេតុផលថា អ្នកជក់បារីរងផលប៉ះពាល់ធ្ងន់ធ្ងរជាងអ្នកមិនជក់បារី ប្រសិនបើឆ្លងជំងឺកូវីដ១៩ អង្គការសុខភាពពិភពលោកបានកំណត់យក “ការផ្ដាច់បារី” ជាប្រធានបទសម្រាប់ទិវាពិភពលោកគ្មានថ្នាំជក់ឆ្នាំ២០២១នេះ។នេះបើតាមសេចក្តីប្រកាសព័ត៌មានរបស់អង្គចលនាដើម្បីសុខភាពកម្ពុជាដែលBTV ទទួលបាននៅថ្ងៃទី១៧ខែឧសភានេះ។
យោងតាមសេចក្តីប្រកាសដដែល បានបន្តថា វិធានការដែលមានប្រសិទ្ធខ្ពស់ក្នុងការ ជួយគាំទ្រអោយប្រជាពលរដ្ឋអាចផ្ដាច់បារីបានជោគជ័យ គឺការដំឡើងពន្ធថ្នាំជក់។ នៅពេលដែលពន្ធថ្នាំជក់កើនឡើង អ្នកជក់បារីជក់តិចជាងមុន ឬ ផ្ដាច់បារីទាំងស្រុង ដែលនាំទៅរក ការថយចុះចំនួនអ្នកស្លាប់ អ្នកពិការ និងអ្នកឈឺដោយការប្រើប្រាស់ថ្នាំជក់។ លើសពីនេះទៀត ការដំឡើងពន្ធថ្នាំជក់ធ្វើអោយរាជរដ្ឋាភិបាលទទួលបានចំណូលពន្ធបន្ថែមសម្រាប់ប្រើប្រាស់លើការទប់ស្កាត់ជំងឺជាពិសេស ការទប់ស្កាត់ និងការព្យាបាលជំងឺកូវីដ១៩។
មានមតិបំភ័ន្តមួយចំនួនបានលើកឡើងថា ការដំឡើងពន្ធថ្នាំជក់ នឹងធ្វើអោយបាត់បង់ចំណូលពន្ធរដ្ឋ ប៉ះពាល់ដល់ឱកាសការងារ ប៉ះពាល់ដល់ប្រជាពលរដ្ឋក្រីក្រ និងធ្វើអោយមានការគេចមិនបង់ពន្ធ។ ប៉ុន្តែប្រទេសជាច្រើនដែលបានដំឡើងពន្ធថ្នាំជក់រួចហើយ ក្នុងនោះ ប្រទេសអាស៊ាន មានហ្វីលីពីន និងថៃ បានបង្ហាញថា បន្ទាប់ពីដំឡើងពន្ធប្រជាពលរដ្ឋជាច្រើនបានផ្ដាច់បារី ហើយរដ្ឋាភិបាលទទួលបានពន្ធបន្ថែមពីថ្នាំជក់យ៉ាងច្រើន ដែលរដ្ឋាភិបាលអាចប្រើប្រាស់ថវិកាទាំងនោះ ដើម្បីទ្រទ្រង់សកម្មភាពលើកកម្ពស់សុខភាពសាធារណៈបានយ៉ាងច្រើន។
ករណីសិក្សាមួយរបស់ការអង្គការសហប្រជាជាតិ ស្ដីពីការវិនិយោគលើការត្រួតពិនិត្យផលិតផលថ្នាំជក់ឆ្នាំ២០១៩ បានបង្ហាញថា កម្ពុជានឹងទទួលចំណូលពន្ធបន្ថែម ២៣៥លានដុល្លារសហរដ្ឋអាមេរិក ក្នុងរយៈពេល៥ឆ្នាំខាងមុខ និង៩៣៣លានដុល្លារសហរដ្ឋអាមេរិក ក្នុងរយៈពេល១៥ឆ្នាំខាងមុខ បើប្រទេសកម្ពុជា ដំឡើងពន្ធលើផលិតផលថ្នាំជក់រហូតដល់៧៥% នៃតំលៃបារីលក់រាយ៕
អត្ថបទ៖ទូច សោភ័ណ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
