ទីក្រុងប៉េកាំង បានតបតយ៉ាងខ្លាំងក្លាត្រឡប់វិញ ចំពោះការចោទប្រកាន់របស់អង្គការសន្ធិសញ្ញាអាត្លង់ទិកខាងជើង ឬអង្គការណាតូ ដែលថា ចិនបង្កការប៉ះពាល់ដល់ផលប្រយោជន៍ និងសន្តិសុខរបស់ប្លុកនេះ ហើយបានប្រឆាំងនឹងការប៉ុនប៉ងណាមួយរបស់សម្ព័ន្ធមិត្តយោធាមួយនេះ ក្នុងការពង្រីកឥទ្ធិពលរបស់ខ្លួនចូលទៅក្នុងតំបន់អាស៊ី-ប៉ាស៊ីហ្វិក។

ក្នុងសេចក្តីថ្លែងការណ៍ផ្លូវការដោយមានប្រើពាក្យសំដីខ្លាំងៗដែលបានចេញផ្សាយ នៅពាក់កណ្តាលផ្លូវនៃកិច្ចប្រជុំកំពូលរយៈពេល ២ថ្ងៃ នៅរដ្ឋធានីវីលនីញូស (Vilnius) ប្រទេសលីទុយអានី កាលពីថ្ងៃអង្គារ (ទី១១ ខែកក្កដា) អង្គការណាតូ បានលើកឡើងថា សាធារណរដ្ឋប្រជាមានិតចិន (PRC) បានបង្កឲ្យមានការប៉ះពាល់ដល់ផលប្រយោជន៍ សន្តិសុខ និងតម្លៃរបស់សម្ព័ន្ធភាពតាមរយៈ «មហិច្ឆតា និងគោលនយោបាយដាក់សម្ពាធ»។

បេសកកម្មតំណាងប្រទេសចិនប្រចាំនៅសហភាពអឺរ៉ុប បាននិយាយនៅក្នុងសេចក្តីថ្លែងការណ៍មួយ កាលពីថ្ងៃអង្គារ (ទី១១ ខែកក្កដា) ថា ប្រធានបទដែលមានខ្លឹមសារទាក់ទងនឹងប្រទេសចិន នៅក្នុងសេចក្តីថ្លែងការណ៍ផ្លូវការនោះ មិនគោរពលើការពិតជាមូលដ្ឋាន បង្ខូចគោលជំហរ និងគោលនយោបាយរបស់ប្រទេសចិន និងធ្វើឲ្យប្រទេសចិនខូចកិត្តិយសដោយចេតនា។ សេចក្ដីថ្លែងការណ៍របស់បេសកម្មនោះ បានបន្ថែមថា៖ «យើងសូមប្រឆាំងយ៉ាងដាច់អហង្ការ និងបដិសេធ ចំពោះការលើកឡើងនេះ»។

ហើយជាមួយគ្នានេះ បេសកកម្មតំណាងប្រទេសចិន ក៏បានសង្កត់ធ្ងន់ដែរថា ប្រទេសចិនជំទាស់ជាដាច់ខាត ចំពោះ«ដំណើរវិវឌ្ឍឆ្ពោះទៅទិសខាងកើតទៅកាន់តំបន់អាស៊ី-ប៉ាស៊ីហ្វិករបស់អង្គការណាតូ ហើយបានព្រមានថា សកម្មភាពណាមួយ ដែលគំរាមកំហែងដល់សិទ្ធិរបស់ទីក្រុងប៉េកាំង នឹងត្រូវបានឆ្លើយតបវិញយ៉ាងម៉ឺងម៉ាត់»៕