ភ្នំពេញ ៖ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី១២ ខែកក្កដា ឆ្នាំ២០២៣នេះ បានប្រកាសបើក​ផ្ដល់​ប្រាក់​ឧបត្ថម្ភ (លើកទី៣) ជូនបងប្អូនកម្មករនិយោជាង ១ ម៉ឺននាក់ នៅតាមបណ្ដារោងចក្រចំនួន ២៥ ក្នុង​វិស័យ​កាត់ដេរ ដែលត្រូវបានព្យួរកិច្ចសន្យាការងារ ស្របតាម​ស្មារតីនៃកញ្ចប់វិធានការ​របស់​រាជរដ្ឋាភិបាល​កម្ពុជា។

​ក្រសួងការងារ បានជូនដំណឹងដល់បងប្អូនកម្មករនិយោជិតចំនួន ១០៦០០ នាក់ នៃរោងចក្រចំនួន ២៥ នៃវិស័យ​វាយនភណ្ឌ កាត់ដេរ ផលិតស្បែកជើង និង​ផលិតផលធ្វើដំណើរ និងកាបូប ដែលទទួល​បាន​ការ​អនុញ្ញាត​ព្យួរ​កិច្ចសន្យា​ការងារ​ស្របតាមស្មារតីនៃសេចក្ដីណែនាំចុះថ្ងៃទី១៥ ខែមីនា ឆ្នាំ២០២៣ ស្ដីពីការព្យួរកិច្ចសន្យា​ការងារ​កម្មករ​​និយោជិត​ធ្វើការនៅរោងចក្រក្នុងវិស័យ វាយនភណ្ឌ កាត់ដេរ ផលិតស្បែកជើង និង​ផលិត​ផលធ្វើ​ដំណើរ និងកាបូប​ដែលរង​ផលប៉ះពាល់ដោយសារវិបត្តិសេដ្ឋកិច្ចសកលថា ធនាគារ វីង នឹងផ្ញើសារអំពីការបើក​ប្រាក់​ឧបត្ថម្ភរបស់​រាជរដ្ឋាភិបាល​ទៅលេខទូរសព្ទដែលបងប្អូនបានផ្ដល់មក​ឱ្យក្រសួងតាមរយៈ​រដ្ឋបាលរោងចក្រ​នាពេលកន្លងមក។

ក្រសួងបញ្ជាក់ថាប្រាក់ឧបត្ថម្ភនេះ នឹងត្រូវបើកផ្តល់ជាប្រាក់រៀល និងអាស្រ័យ​លើចំនួនថ្ងៃ​នៃការព្យួរ​កិច្ចសន្យា​ការងារ​​ក្នុង​នោះចំនួន ៨១.០០០ រៀល (២០ដុល្លារអាមេរិក) សម្រាប់ការព្យួរកិច្ចសន្យាការងាររយៈពេល ៧ ថ្ងៃ ដល់ ១៤ថ្ងៃ។ ១៦២ ០០០រៀល (៤០ដុល្លារអាមេរិក) សម្រាប់ការព្យួរកិច្ចសន្យាការងាររយៈពេល ១៥ ថ្ងៃដល់ ១ខែ។

សូមជម្រាបថាយោងតាមអនុសាសន៍ណែនាំដ៏ខ្ពង់ខ្ពស់បំផុតរបស់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា ដើម្បីរក្សាលំនឹងជីវភាពរស់នៅរបស់កម្មករនិយោជិត និងធានានូវស្ថិរភាពអាជីវ​កម្មរបស់រោងចក្រ​ដែលមាន​ការ​ថមថយច្រវាក់ផលិតកម្មក្នុងបរិបទនៃវិបត្តិសេដ្ឋកិច្ចសកល បងប្អូនកម្មករនិយោជិត​ដែលត្រូវបានព្យួរ​កិច្ចសន្យា​ការងារចាប់ពីថ្ងៃទី១ ខែមេសា ឆ្នាំ២០២៣ នឹងត្រូវទទួលបានប្រាក់ឧបត្ថម្ភ ចំនួន ២០ដុល្លារអាម៉េរិក ពីរាជរដ្ឋាភិបាល និងចំនួន ១៥ ដុល្លារអាម៉េរិក ពីនិយោជកសម្រាប់ការព្យួរកិច្ចសន្យាការងាររយៈពេល ៧ ថ្ងៃ ទៅ ១៤ថ្ងៃ និងចំនួន ៤០ដុល្លារអាម៉េរិក ពីរាជរដ្ឋាភិបាល និងចំនួន ៣០ ដុល្លារអាម៉េរិក ពីនិយោជិក សម្រាប់ការ​ព្យួរកិច្ចសន្យាការងារ​រយៈពេល ១៥ថ្ងៃ ទៅ ១ខែ៕ អត្ថបទ៖ វ៉ន ដារ៉ា