ស្ថាប័នឧស្សាហកម្មមួយ បានឲ្យដឹងកាលពីថ្ងៃអង្គារ (ទី១១ ខែកក្កដា)ថា ការខូចខាតពីកុបកម្មដែលបង្កឡើងដោយនគរបាលសម្លាប់ក្មេងជំទង់ម្នាក់ក្នុងប្រទេសបារាំង បានបណ្តាលឱ្យចំណាយប្រាក់ធានារ៉ាប់រងចំនួន ៧១៥លានដុល្លារអាមេរិក។

រដ្ឋាភិបាល បានបង្ក្រាបភាពចលាចលជាច្រើនថ្ងៃ បន្ទាប់ពីនគរបាល បានបាញ់សម្លាប់ ក្មេងជំទង់ឈ្មោះ Nahel M អាយុ ១៧ ឆ្នាំក្នុងអំឡុងពេលឈប់ស្តុបចរាចរណ៍ នៅជាយទីក្រុងប៉ារីស កាលពីថ្ងៃទី២៧ ខែមិថុនា។

យុវជន Nahel មានដើមកំណើតអាល់ហ្សេរី ហើយការស្លាប់នេះ បានបង្កឱ្យមានការចោទប្រកាន់ឥតឈប់ឈរចំពោះការរើសអើងជាតិសាសន៍ជាប្រព័ន្ធនៅក្នុងប្រទេសបារាំង។

ប្រធានសហព័ន្ធ France Assureurs លោក Florence Lustman ដែលបានដាក់វិក្កយបត្រមានចំនួនទឹកប្រាក់៦៥០លានអឺរ៉ូ បាននិយាយថា មានបណ្តឹងទាមទារសំណងចំនួន១១.៣០០ករណីពាក់ព័ន្ធនឹងកុបកម្ម៕