ភ្នំពេញ៖ ក្នុងអន្តរកាលកូវីដ-១៩ និងគិតមកដល់ពេលនេះ មនី្ទរពេទ្យមិត្តភាពខ្មែរ-សូវៀត ទទួលអ្នកជំងឺកូវីដ-១៩ សម្រាកសរុបចំនួន៣,៥៥២នាក់ និងធ្វើសំណាកបានចំនួន ៧៤,១២៦សំណាក ​និងធ្វើតេស្តរហ័សបានចំនួន៦២,២២៦តេស្ត។

ការថ្លែងរបស់ឯកឧត្តម សាស្ត្រាចារ្យ ងី ម៉េង នាយកមនី្ទរពេទ្យមិត្តភាពខ្មែរ-សូវៀត យ៉ាងដូច្នេះ ក្នុង​ពិធីប្រគល់ប័ណ្ណសរសើររបស់រាជរដ្ឋាភិបាលកម្ពុជាជូនថ្នាក់ដឹកនាំ ​និងមន្រ្តីសុខាភិបាល នៃ​មន្ទីរពេទ្យមិត្តភាពខ្មែរ-សូរៀត ដែលបានរួមចំណែកប្រយុទ្ធ ​នឹងជំងឺកូវីដ-១៩ ដោយស្មារតីទទួល​ខុសត្រូវខ្ពស់ ក្រោមការដឹកនាំផ្ទាល់ដ៏ខ្ពង់ខ្ពស់​ ប្រកបដោយគតិបណ្ឌិតរបស់​សម្តេចតេជោ ហ៊ុន សែន នាយករដ្ឋមន្រ្តី , នាព្រឹកថ្ងៃទី១៣ ខែកក្កដា ឆ្នាំ២០២៣នេះ។

ឯកឧត្តមសាស្រ្តាចារ្យ ងី ម៉េង បានរំលឹកអំពីប្រវត្តិ ស្ថានភាព និងសមិទ្ធិផលចម្បងៗ​ក្នុងការប្រយុទ្ធ​នឹងជំងឺកូវីដ-១៩ ក្នុងមន្ទីរពេទ្យ ជាច្រើនដែលសម្រេចបានដូចខាងក្រោម៖ ១. ចាប់ផ្តើម​ពី​ដំណាក់កាលដំបូង នៃការរីករាលដាលនៃជំងឺកូវីដ-១៩ ក្នុងនាមមន្ទីរពេទ្យមិត្តភាពខ្មែរ-សូវៀត បានចូលរួម ​និងដើរតួនាទីសំខាន់លើការងារទប់ស្កាត់ការព្យាបាល ​ការចាក់វ៉ាក់សាំង ដើម្បីបង្ការ​ទប់ស្កាត់ការរីករាលដាលជំងឺកូវីដ-១៩ នៅក្នុងព្រះរាជាណាចក្រកម្ពុជា ​និងបានទទួលអ្នកជំងឺកូរីដ-១៩ ធ្វើសំណាក និងធ្វើតេស្តរហ័ស ហើយក្រុមគ្រូពេទ្យយើងក៏ចូលរួមចំណែក​ជួយបណ្តុះបណ្តាល​ដល់ក្រុមគូ្រពេទ្យ គិលានុបដ្ឋាក នៅតាមបណ្តាខេត្តនានាផងដែរ។

ក្នុងនោះផងដែរក្រុមគ្រូពេទ្យ ជំនាញដែលបានដឹកនាំព្យាបាលនៅមជ្ឈមណ្ឌលនានា ក៏បានទទួល​នូវ​ការទុកចិត្ត និងលើកទឹកចិត្តឲ្យក្លាយ ​ជាថ្នាក់ដឹកនាំនៅមន្ទីរពេទ្យថ្នាក់ជាតិមួយចំនួនផងដែរ ក្រោមការចង្អុលបង្ហាញពី ​ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល និង​ជាប្រធានគណៈកម្មការអន្តរក្រសួងប្រយុទ្ឋនឹងជំងឺកូវីដ-១៩ ​ព្រមទាំងថ្នាក់ដឹកនាំក្រសួង ដែលបាន​គិតគូរហ្មត់ចត់ ​និងបានលើកទឹកចិត្ត ព្រមទាំងផ្តល់ ​មធ្យោបាយគ្រប់បែបយ៉ាងដល់មន្ត្រី និងអង្គភាព​ក្រោមឱវាទ និងពាក់ព័ន្ធទាំងអស់។

ជាចុងក្រោយឯកឧត្តម សាស្រ្តាចារ្យ នាយកមនី្ទរពេទ្យ បានសង្កត់ធ្ងន់ថា ក្រោយពីស្ថានភាព​ជំងឺកូវីដ-១៩ បានថមថយ អ្វីៗបានដំណើរការធម្មតាឡើងវិញ ក្នុងនោះគ្រប់បណ្តាផ្នែក​ទាំងអស់​ក្នុងមនី្ទរពេទ្យ បានផ្តល់សេវាព្យាបាលជំងឺជូនដល់ប្រជាពលរដ្ឋគ្រប់ជំនាញ ទន្ទឹមនឹងនោះមនី្ទរពេទ្យ​ក៏បានអភិវឌ្ឍន៍​ ដោយមានការគាំទ្រ ពីប្រមុខរាជរដ្ឋាភិបាលគ្រប់ផ្នែកទាំងអស់ មានអគារថ្មី បំពាក់​សម្ភារៈបរិក្ខារវេជ្ជសាស្រ្តថ្មីបន្ថែម ដែលកំពុងដំណើរការរាល់ថ្ងៃ ដើម្បីឲ្យការផ្តល់សេវាថែទាំ កាន់តែមានប្រសិទ្ធភាព។ ជាពិសេសមនី្ទរពេទ្យ កំពុងសាងសង់អគារថ្មីមួយបន្ថែមទៀត មានកម្ពស់១០ជាន់ ដែលជាថវិការបស់រាជរដ្ឋាភិបាល។

ដោយឡែកក្រុមការងារគ្រូពេទ្យរបស់យើង​ ផ្តល់សេវាជូនបងប្អូនប្រជាពលរដ្ឋប្រកបដោយ​ក្រមសីលធម៌វិជ្ជាជីវៈ និងប្រសិទ្ធភាពខ្ពស់បំផុត ដោយមិនទុកឲ្យប្រជាពលរដ្ឋ​ណាមួយ​ដែលមានបញ្ហាសុខភាពនោះ​ មិនទទួលបានការព្យាបាលជំងឺនោះទេ៕អត្ថបទ រដ្ឋា