ក្រសួងការបរទេសសហរដ្ឋអាមេរិក បាននិយាយនៅក្នុងសេចក្តីប្រកាសចុងក្រោយនៃអន្តរកម្ម​ជា​បន្តបន្ទាប់​រវាងប្រទេសមហាអំណាចជាគូប្រជែងទាំងពីរថា រដ្ឋមន្ត្រីការបរទេសសហរដ្ឋអាមេរិក លោក Antony Blinken នឹងជួបអ្នកការទូតជាន់ខ្ពស់ចិនលោក Wang Yi នៅថ្ងៃព្រហស្បតិ៍នេះ ខណៈក្រុមមន្ត្រីបានមកជួបជុំគ្នា សម្រាប់កិច្ចប្រជុំអាស៊ាន។

លោក Wang តំណាងឲ្យប្រទេសចិន នៅក្នុងកិច្ចប្រជុំនៅទីក្រុងហ្សាកាតា ដែលកំពុងចូលរួម​ជាមួយ​សមាគមប្រជាជាតិអាស៊ីអាគ្នេយ៍ឬអាស៊ាន ​និងបណ្តាប្រទេសជាដៃគូ បន្ទាប់ពីទីក្រុងប៉េកាំង​និយាយថា ​រដ្ឋមន្ត្រីការបរទេសលោកឈីន ហ្គាង (Qin Gang) ​នឹងមិនបានមកចូលរួមនោះទេ ដោយ​មូលហេតុសុខភាព។

លោក Blinken បានជួបលោក Qin និងលោក Wang នៅក្នុងទីក្រុងប៉េកាំងកាលពីខែមុន ដែលបាន​បង្កើត​ជាដំណើរទស្សនកិច្ចលើកដំបូងទៅកាន់​ប្រទេសចិន ​ធ្វើឡើង​ដោយ​រដ្ឋមន្ត្រីការបរទេស​សហរដ្ឋអាមេរិក​ក្នុងរយៈពេល៥ឆ្នាំមកនេះ។

វាជាបំណងក្នុងការនាំយកស្ថិរភាពមកកាន់ភាពប្រកួតប្រជែងដ៏តានតឹង រវាងប្រទេសមហាអំណាច​ទាំងពីរ ដែលជាប្រទេសមានសេដ្ឋកិច្ចធំបំផុតទាំងពីររបស់ពិភពលោក។

រដ្ឋមន្ត្រីរតនាគារសហរដ្ឋអាមេរិក លោកស្រី​ Janet Yellen បានធ្វើទស្សនកិច្ចនៅប្រទេសចិន កាលពីដើមខែនេះ ហើយសកម្មជនអាកាសធាតុ លោក John Kerry នឹងបំពេញទស្សនកិច្ច​នៅសប្តាហ៍ក្រោយ។