ភ្នំពេញ ៖ ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានអញ្ជើញជាអធិបតីក្នុង ពិធី ប្រគល់ប័ណ្ណសរសើររបស់រាជរដ្ឋាភិបាលកម្ពុជា ជូនមន្ត្រីសុខាភិបាល នៃមន្ទីរពេទ្យព្រះអង្គឌួង និងវិទ្យាស្ថានជាតិ សុខភាពសាធារណៈ នារសៀលថ្ងៃទី១៣ ខែកក្កដា ឆ្នាំ២០២៣នេះ។

ឯកឧត្តមសាស្ត្រាចារ្យរង លូ លីឃាង នាយកមន្ទីរពេទ្យព្រះអង្គឌួង បានលើកឡើងថា ចាប់ផ្តើមដំណាក់កាល ដំបូងនៃការរីករាលដាលនៃជំងឺកូវីដ-១៩ ក្រសួងសុខាភិបាល ដែលមានឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រី ក្រសួងសុខាភិបាល បានការណែនាំ និងចង្អុលបង្ហាញក្នុងការដាក់ឱ្យមន្ទីរពេទ្យព្រះអង្គឌួង ជាមណ្ឌលព្យាបាល និងសង្គ្រោះបន្ទាន់សម្រាប់អ្នកជំងឺកូវីដ-១៩ កាលពីថ្ងៃទី១៥ ខែមិថុនា ឆ្នាំ២០២១ ដោយអនុវត្តតាម ការណែនាំមិន ស្ទាក់ស្ទើរឡើយ ដើម្បីចូលរួមជាមួយក្រសួងសុខាភិបាល ក៏ដូចជារាជរដ្ឋាភិបាលក្នុងការប្រយុទ្ធប្រឆាំង នឹងជំងឺដ៏ កាចសាហាវមួយនេះ រហូតទទួលបានជោគជ័យគួរជាមោទនៈ។ ក្នុងនោះផងដែល មន្ត្រីដែលចូលរួម យ៉ាងសកម្ម ក្នុងមណ្ឌលព្យាបាល និងសង្គ្រោះបន្ទាន់ មានចំនួន១៥៤នាក់ ស្រី៦៦នាក់។ ក្នុងនោះផងដែរ វិទ្យាស្ថានជាតិសុខ ភាពសាធារណៈ ក៏ជាតួអង្គ សំខាន់ផងដែរ ក្នុងការយកសំណាក និងធ្វើតេស្ដរកអ្នកឆ្លងមេរោគមួយនេះ។ មន្ដ្រីសុខាភិបាលនៃវិទ្យាស្ថានបានទៅធ្វើសំណាកនៅទីតាំងមួយចំនួន និងវិទ្យាស្ថានជាកន្លែង ដែលទទួលសំណាក ត្រូវធ្វើតេស្តរកមេរោគផងដែរ។ នេះគឺជាការចូលរួមនឹងសហការជាធ្លុងមួយក្នុងការប្រយុទ្ធប្រឆាំងនឹងជំងឺកូវីដ-១៩ រហូតយើងអាចទទួលជោគជ័យ។

ឆ្លៀតក្នុងឱកាសនោះអនុញ្ញាតឱ្យឯកឧត្តម សាស្រ្តាចារ្យ ម៉ម ប៊ុនហេង រំលឹកអំពីការងារប្រយុទ្ធ នឹងជំងឺកូវីដ-១៩ នាពេលកន្លង ដែលប្រទេសកម្ពុជាត្រូវបានពិភពលោកប្រសិទ្ធនាមថា «កម្ពុជាជាប្រទេសតូច មានបេះដូងធំទូលាយ» ដោយបានគ្រប់គ្រង ឆ្លើយតប ការរាតត្បាតជំងឺកូវីដ-១៩ ដោយជោគជ័យ គឺពិតជាមានមោទនៈភាព ចំពោះការខិតខំ ប្រឹងប្រែងដ៏អស្ចារ្យ របស់សង្គមជាតិទាំងមូល រួមទាំងជនបរទេសទាំងអស់ដែលស្នាក់នៅក្នុងប្រទេសកម្ពុជា ហើយសមិទ្ធផល គួរឱ្យកត់សម្គាល់នេះ កើតឡើងក្រោមការដឹកនាំផ្ទាល់ប្រកប​ដោយ​គតិបណ្ឌិតរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា តាមរយៈការប្រើប្រាស់កម្លាំង សរុបរបស់ជាតិ និងមានការចូលរួមរបស់សង្គមជាតិទាំងមូល ដែលអាចឱ្យកម្ពុជាបើកដំណើរការឡើងវិញ ទាំង សកម្មភាពសេដ្ឋកិច្ច និងសង្គមតាំងពីខែវិច្ឆិកា ឆ្នាំ២០២១។ មេរៀនបទពិសោធន៍ទាំងអស់នេះ អាចឱ្យយើងយក ឈ្នះលើសមរភូមិកូវីដ-១៩ តែរាជរដ្ឋាភិបាលនៅតែបន្តតាមដានដោយយកចិត្តទុកដាក់ ព្រោះសង្គ្រាមកូវីដ-១៩ មិនទាន់ចប់នៅឡើយ។ ឆ្លៀតក្នុងឱកាសនេះ ឯកឧត្តម រដ្ឋមន្រី្ត សូមសម្តែងនូវការកោតសរសើរចំពោះថ្នាក់ដឹកនាំ មន្ត្រីសុខាភិបាលទាំងអស់ អាជ្ញាធរគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ និងប្រជាពលរដ្ឋទូទាំង ប្រទេស ដែលបានចូលរួមសហការក្នុងការប្រយុទ្ធនឹងជំងឺកូវីដ-១៩ ព្រមទាំងធានាបាននូវការ ផ្តល់សេវាសុខភាព ជាសារវ័ន្ត ទោះបីជាទូទាំងប្រទេសបានរងនូវផលប៉ះពាល់ដោយវិបត្តិជំងឺកូវីដ-១៩ ក៏ដោយ៕ អត្ថបទ៖ រដ្ឋា