ទាហានរុស្ស៊ី និងអ៊ុយក្រែនបានបន្តការបាញ់ប្រហារគ្នាកាលពីថ្ងៃពុធ ខណៈដែលជម្លោះក៏នៅតែបន្ត ដោយម្នាក់ៗវាយប្រហារទៅលើគោលដៅយោធារបស់ភាគីម្ខាងទៀត ដែលរួមមានឃ្លាំងអាវុធ យន្តហោះចម្បាំង និងប្រព័ន្ធការពារដែនអាកាស។

ក្រសួងការពារជាតិរុស្ស៊ីបានចេញរបាយការណ៍សង្គ្រាមមួយកាលពីថ្ងៃពុធដោយនិយាយថា ក្នុងរយៈពេល២៤ម៉ោងកន្លងមក កងទ័ពរុស្ស៊ីបានវាយតបតការវាយប្រហារជាច្រើនដោយកងទ័ពអ៊ុយក្រែនក្នុងទិសដៅទីក្រុង Kupiansk, ទីក្រុងLyman, តំបន់Donetsk, តំបន់ Zaporizhzhia និងតំបន់ Kherson ដោយបានវាយប្រហារឃ្លាំងគ្រាប់រំសេវ និងបាញ់ទម្លាក់ឧទ្ធម្ភាគចក្រ Mi-24 របស់អ៊ុយក្រែនទៀតផង។

កងកម្លាំងការពារដែនអាកាសរុស្ស៊ី បានស្ទាក់ចាប់មីស៊ីលតម្រង់គោលដៅស្រមោលព្យុះរបស់អ៊ុយក្រែន និងយានដ្រូនមួយចំនួនផងដែរ។

នៅថ្ងៃដដែលនោះ អគ្គសេនាធិការនៃកងកម្លាំងប្រដាប់អាវុធអ៊ុយក្រែនក៏បានចេញរបាយការណ៍មួយដោយនិយាយថា កងទ័ពរុស្ស៊ីបានបន្តប្រមូលផ្តុំកងកម្លាំងតាមទិសដៅទីក្រុងKupiansk, ទីក្រុងLyman, ទីក្រុងBakhmut, ទីក្រុងAvdiivka និងទីក្រុងMarinka។

យោងតាមរបាយការណ៍បានឱ្យដឹងថា កងទ័ពអ៊ុយក្រែនបានវាយប្រហារប៉ុស្តិ៍ទីបញ្ជាការរុស្ស៊ី ប្រព័ន្ធមីស៊ីលការពារដែនអាកាស ប្រព័ន្ធសង្គ្រាមអេឡិចត្រូនិក និងគោលដៅផ្សេងទៀត ព្រមទាំងការវាយឆ្មក់តាមអាកាសលើទីតាំងយោធារបស់រុស្ស៊ីផងដែរ៕