បាត់ដំបង៖ឯកឧត្តម អង្គវង្ស វឌ្ឍានា ប្រធាន និងឯកឧត្តម កើត រិទ្ធ អនុប្រធានទី១​ក្រុមការងារ​គណបក្សប្រជាជន​កម្ពុជាចុះមូលដ្ឋានស្រុកមោងឫស្សី បានដឹកនាំក្រុមការងារ ប្រជាពលរដ្ឋ យុវជន និងសិស្សានុសិស្ស​រៀបចំ​យុទ្ធនា​ការ​បៃតងសន្តិភាពដើម្បីដាំដើម​ឈើរាប់ម៉ឺនដើមនៅក្នុងមូលដ្ឋានស្រុកមោងឫស្សីសំដៅលើកកម្ពស់​សោភ័ណភាព​បរិស្ថានបៃតង។

ក្នុងយុទ្ធនាការបៃតងសន្តិភាពមោងឫស្សី នាថ្ងៃទី១៣ ខែកក្កដា ឆ្នាំ២០២៣នេះ ឯកឧត្តម កើត រិទ្ធ បានថ្លែងឱ្យដឹងថា យុទ្ធនាការបៃតងសន្តិភាព ធ្វើឡើងក្នុងគោលបំណងដើម្បីអបអរសាទររុក្ខទិវា៩ កក្កដា ប្រែក្លាយទេសភាព​ស្រុកមោង​ឫស្សីឱ្យមានភាពបៃតងស្រស់ត្រកាល បំផុសឱ្យប្រជាពលរដ្ឋ យុវជន និងសិស្សានុសិស្សស្រឡាញ់ដើមឈើ។

ឯកឧត្តម កើត រិទ្ធ បានអំពាវនាវដល់បងប្អូនប្រជាពលរដ្ឋសូមចូលរួមថែរក្សា និងបង្កើនការដាំដើមឈើ​បន្ថែមទៀត​នៅតាមមូលដ្ឋាន ព្រោះការដាំដើមឈើច្រើនបង្កើតបានភាពត្រជាក់ត្រជុំ ទប់ទល់ការប្រែប្រួល​អាកាសធាតុដែល​កាន់តែក្ដៅឡើង ជាពិសេសដើមឈើផ្ដល់ខ្យល់អុកស៊ីសែនជំនួយដល់សុខភាព។

មានប្រសាសន៍នៅក្នុងពិធីនេះដែរ ឯកឧត្តម អង្គ វង្ស វឌ្ឍានា ប្រធានក្រុមការងារចុះជួយស្រុកមោងឫស្សី បាន​មាន​គូសបញ្ជាក់ថា យុទ្ធនាការ "បៃតងសន្តិភាពមោងឫស្សី" ត្រូវបានរៀបចំឡើងក្នុងពេលដែលប្រទេសកម្ពុជាមាន​សុខសន្តិភាព​ពេញបរិបូរណ៍ និងមានការអភិវឌ្ឍឥតឈប់ឈរ។ កត្តាសុខសន្តិភាពបានផ្តល់ឱកាសឱ្យក្រុមការងារចុះជួយស្រុកមោងឫស្សី អាចរៀបចំនូវព្រឹត្តិការណ៍​ជាច្រើននៅក្នុង​ស្រុកមោងឫស្សី នាពេលកន្លងមក។

ពាក់ព័ន្ធនឹងយុទ្ធនាការបៃតងសន្តិភាពមោងឫស្សីនេះ ឯកឧត្តម កេង សុម៉ារិទ្ធ សមាជិកក្រុមការងារយុវជន​ប្រចាំស្រុកមោងឫស្សី បានថ្លែងឱ្យដឹងថា កូនឈើដែលនឹងត្រូវដាំនៅក្នុងមូលដ្ឋានស្រុកមោងឫស្សីមានចំនួន១៥ ០០០ដើម មានដូចជាប្រភេទដើមក្ងោក ធ្នង់ ឈើទាល គគីរ និងបេងជាដើម។

សូមបញ្ជាក់ថា យុទ្ធនាការបៃតងសន្តិភាពនេះ នឹងធ្វើការដាំដើមឈើដោយចែកចេញជា៣​ដំណាក់កាល​គឺ​៖ ដំណាក់កាលទី១.ដាំតាមបណ្ដោយផ្លូវជាតិក្នុងភូមិសាស្រ្តស្រុកមោងឫស្សី​ដែលមានប្រវែង៤៣គីឡូម៉ែត្រ

ដំណាក់កាលទី២.ដាំពីផ្លូវបំបែកចេញពីផ្លូវជាតិចូលទៅតាមបណ្ដាឃុំនីមួយៗ និង​

ដំណាក់កាលទី៣.ដាំនៅតាមទីធ្លាសាធារណៈ ដូចជាសាលារៀន មន្ទីរពេទ្យ និងវត្តអារាមជាដើម៕ ដោយ ៖ សុខរិទ្ធិ