ភ្នំពេញ ៖ កម្ពុជាបញ្រ្ជាបការយល់ដឹងដល់ភាគីពាក់ព័ន្ធ ជាពិសេសដល់ធុរជន ក្នុងវិស័យធនាគារ និងហិរញ្ញវត្ថុ អំពីច្បាប់ស្តីពីការប្រកួតប្រជែង និងបទប្បញ្ញត្តិពាក់ព័ន្ធ ជាពិសេសអនុក្រឹត្យស្ដីពីលក្ខខណ្ឌ និងនីតិវិធី​អំពីការរួមបញ្ចូលគ្នានៃធុរកិច្ច ក៏ដូចជួយជំរុញឱ្យធុរជន ដែលធ្វើធុរកិច្ច ប្រកួតប្រជែងគ្នាប្រកបដោយសមធម៌ ស្មោះត្រង់ និងការពារផលប្រយោជន៍របស់អ្នកប្រើប្រាស់ជាដើម។

​នៅថ្ងៃទី ១៣ ខែ កក្កដា ឆ្នាំ ២០២៣ ឯកឧត្តម ផាន អូន ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយក នៃ​អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ «ក.ប.ប.» តំណាងឲ្យ​ក្រសួងពាណិជ្ជកម្ម និងលោក ហេង បូមករា អគ្គនាយករងត្រួតពិនិត្យ តំណាងឲ្យធនាគារជាតិនៃកម្ពុជា សហការគ្នា រៀបចំសិក្ខាសាលាផ្សព្វផ្សាយស្តីពី «ការអនុវត្តច្បាប់ស្តីពីការប្រកួតប្រជែង និងអនុក្រឹត្យស្តីពី​លក្ខខណ្ឌនិង​នីតិវិធី​អំពីការរួមបញ្ចូលគ្នានៃធុរកិច្ច» ព្រោះសិក្ខាសាលានេះ បានដើរតួជាវេទិកាមួយក្នុងការផ្សព្វផ្សាយ បញ្រ្ជាបការ​យល់​ដឹងដល់ភាគីពាក់ព័ន្ធ ជាពិសេសដល់ធុរជនក្នុងវិស័យធនាគារ និងហិរញ្ញវត្ថុ ឱ្យបានទូលំទូលាយ អំពីច្បាប់ស្តីពីការ​ប្រកួតប្រជែង និងបទប្បញ្ញត្តិពាក់ព័ន្ធ ជាពិសេសអនុក្រឹត្យស្ដីពីលក្ខខណ្ឌ និងនីតិវិធីអំពីការរួមបញ្ចូលគ្នានៃធុរកិច្ច ដែលរាជរដ្ឋាភិបាលទើបអនុម័តនាពេលថ្មីៗនេះ នឹងចាប់អនុវត្តពីថ្ងៃទី ៦ ខែកញ្ញា ឆ្នាំ២០២៣ ខាងមុខ ដោយក្នុង​អនុក្រឹត្យនេះ បានកំណត់នូវកាតព្វកិច្ចសំខាន់ៗចំនួន ០៣ ដែលធុរជនក្នុងវិស័យធនាគារ និងហិរញ្ញវត្ថុ ត្រូវតែ​ដឹងអំពីកាតព្វកិច្ចទាំងនេះរួមមាន៖ ការជូនដំណឹងជាមុនអំពីការរួមបញ្ចូលគ្នានៃធុរកិច្ច, ការជូនដំណឹង​ជាក្រោយ​អំពីការរួមបញ្ចូលគ្នានៃធុរកិច្ច និងការចុះបញ្ជីការរួមបញ្ចូលគ្នានៃធុរកិច្ច។

ក្រៅពីគោលការណ៍ខាងលើ សិក្ខាសាលាផ្សព្វផ្សាយនេះ ក៏ជួយជំរុញឱ្យធុរជន ដែលធ្វើធុរកិច្ចក្នុងវិស័យនេះ ប្រកួតប្រជែងគ្នាប្រកបដោយសមធម៌ ព្រមទាំងការធ្វើធុរកិច្ចដោយស្មោះត្រង់ និងសុចរិត ការពារផល​ប្រយោជន៍​របស់អ្នកប្រើប្រាស់ និងលើកកម្ពស់ការអនុវត្តច្បាប់ស្ដីពីការប្រកួតប្រជែង អនុក្រឹត្យស្ដីពីលក្ខខណ្ឌ និងនីតិវិធី​អំពីការរួមបញ្ចូលគ្នា នៃធុរកិច្ចប្រកបដោយប្រសិទ្ធភាព ក្នុងវិស័យធនាគារ និងហិរញ្ញវត្ថុ ព្រមទាំងជួយ​ឱ្យធុរជន​ក្នុងវិស័យនេះ មានមូលដ្ឋានគតិយុត្តក្នុងការស្នើសុំរួមបញ្ចូលគ្នា នៃធុរកិច្ចរបស់ខ្លួនតាមនីតិវិធីជាធរមាន។

សូម​បញ្ជាក់ថា សិក្ខាសាលានេះ គឺជាសិក្ខាសាលាលើកទី១ ដែលអគ្គនាយកដ្ឋាន ក.ប.ប. សហការជាមួយ​ធនាគារជាតិ​នៃកម្ពុជា រៀបចំផ្សព្វផ្សាយដល់ធុរជនក្នុងវិស័យធនាគារ និងហិរញ្ញវត្ថុ ក្នុងឆ្នាំ ២០២៣ ពាក់ព័ន្ធ​នឹងច្បាប់ស្តីពីការប្រកួតប្រជែង និងអនុក្រឹត្យស្ដីពីលក្ខខណ្ឌ និងនីតិវិធីអំពីការរួមបញ្ចូលគ្នានៃធុរកិច្ច។ ជុំវិញការផ្សព្វផ្សាយនេះដែរ នាពេលកន្លងទៅ អគ្គនាយកដ្ឋាន ក.ប.ប. បានរៀបចំសិក្ខាសាលាផ្សព្វផ្សាយចំនួន ២៧ លើករួចហើយ ពាក់ព័ន្ធនឹងការផ្សព្វផ្សាយច្បាប់ស្តីពីការប្រកួតប្រជែង និងច្បាប់ស្តីពីកិច្ចការពារអ្នកប្រើប្រាស់ ក្នុងនោះនៅក្នុងឆ្នាំ ២០២២ បានរៀបចំ ២១ លើក ដែលក្នុងនោះមានកិច្ចសហការជាមួយទីភ្នាក់ងារ GIZ ចំនួន ៤លើក និងសភាពាណិជ្ជកម្មកម្ពុជាចំនួន ១៧ លើក និងក្នុងឆ្នាំ ២០២៣ មានចំនួន ៦ លើក ដោយមានកិច្ចសហការ​ជាមួយ​ទីភ្នាក់ងារ GIZ ក្នុងក្របខណ្ឌទូទាំងប្រទេស។ ជារួមច្បាប់ស្ដីពីការប្រកួតប្រជែង និងបទប្បញ្ញត្តិពាក់ព័ន្ធ ត្រូវបាន​ផ្សព្វផ្សាយ​ដល់ធុរជន ទូទាំងប្រទេសរួចហើយ ជាពិសេសនៅរាជធានីភ្នំពេញ ដែលមានសកម្មភាព​ធុរកិច្ចជា​ច្រើន​បានកំពុងតែកើនឡើង៕ អត្ថបទ៖ស៊ុន រ៉ាឌី