រដ្ឋភិបាលទីក្រុង បាននិយាយថា ការផ្គត់ផ្គង់ទឹកស្អាតនៅក្នុងរដ្ឋធានីនៃប្រទេសឥណ្ឌា នឹងធ្លាក់ចុះមួយភាគបួន នៅថ្ងៃព្រហស្បតិ៍ (ទី១៤ ខែកក្កដា) និងថ្ងៃសុក្រ (ទី១៥ ខែកក្កដា) ដោយសារតែរោងចក្រប្រព្រឹត្តិកម្មទឹកស្អាតទាំង៣ ត្រូវបានជន់លិច ខណៈដែលទឹកទន្លេ Yamuna បានឡើងខ្លាំង បន្ទាប់ពីមានភ្លៀងធ្លាក់ឥតឈប់ឈរ។

ទឹកទន្លេរបស់ទីក្រុងដេលី (Delhi) ស្ថិតនៅកម្រិតខ្ពស់បំផុត ក្នុងរយៈពេល ៤៥ឆ្នាំ បន្ទាប់ពីមានភ្លៀងធ្លាក់ខ្លាំងខុសធម្មតា នៅក្នុងរដ្ឋជិតខាង ដូចជារដ្ឋ Haryana។ ទីក្រុងដែលមានប្រជាជន ២០លាននាក់ ក៏បានឃើញមានភ្លៀងធ្លាក់ខ្លាំង កាលពីចុងសប្តាហ៍ ដោយជន់លិចសហគមន៍ទំនាបៗ រហូតបង្ខំមនុស្សរាប់រយនាក់ត្រូវស្វែងរកទីជម្រក នៅក្នុងជំរំសង្គ្រោះ។

រដ្ឋមន្ត្រីប្រចាំរដ្ឋ លោក Arvind Kejriwal បានឲ្យដឹងនៅលើបណ្ដាញសង្គម Twitter ថា៖ «នឹងមានបញ្ហាទឹកប្រើប្រាស់នៅក្នុងតំបន់មួយចំនួននៃទីក្រុងដេលីជាមិនខាន» ហើយលោកបាននិយាយពីរោងចក្រប្រព្រឹត្តិកម្មទឹកទាំង៣ថា៖ «នៅពេលទឹកទន្លេ Yamuna ស្រកវិញ យើងនឹងព្យាយាមចាប់ផ្តើមដំណើរការឡើងវិញឲ្យបានឆាប់តាមដែលអាចធ្វើទៅបាន»។

នាយកដ្ឋានឧតុនិយមឥណ្ឌា (IMD) បានឲ្យដឹងថា ទីក្រុងដេលី មានទឹកភ្លៀងខ្លាំងលើសពីមធ្យម ១១២ភាគរយ រហូតមកដល់ពេលនេះ។ ជំនន់ទឹកភ្លៀង ក្រៅពីបានមានការបំផ្លិចបំផ្លាញយ៉ាងធ្ងន់ធ្ងរលើហេដ្ឋារចនាសម្ព័ន្ធហើយនោះ ថែមទាំងបានឆក់យកជីវិតមនុស្សជាង ១០០នាក់ផងដែរ នៅទូទាំងប្រទេសឥណ្ឌា ដោយអ្នកស្លាប់ត្រូវបានរាយការណ៍ថា មាននៅក្នុងរដ្ឋ Himachal Pradesh, Uttarakhand, Uttar Pradesh, Punjab និង Rajasthan៕