យោងតាមទីភ្នាក់ងារសារព័ត៌មានរដ្ឋ TASS បានឲ្យដឹងថា ប្រធានចារកម្មបរទេសរបស់រុស្ស៊ីលោក Sergey Naryshkin បាននិយាយថា លោកនិងសមភាគី CIA លោក William Burns បានពិភាក្សាគ្នា នូវអ្វីដែលត្រូវធ្វើជាមួយអ៊ុយក្រែន ក្នុងកិច្ចពិភាក្សាតាមទូរស័ព្ទកាលពីចុងខែកន្លងទៅនេះ។ 

សារព័ត៌មាន New York Times និង Wall Street Journal បានរាយការណ៍កាលពីថ្ងៃទី៣០ ខែមិថុនា ថា លោក Burns បានទូរស័ព្ទទៅលើ Naryshkin ដើម្បីធានាដល់វិមានក្រឹមឡាំងថា សហរដ្ឋអាមេរិក គ្មានតួនាទីនៅក្នុងការប៉ះបោរយៈពេលខ្លីកាលពី១សប្តាហ៍មុន ធ្វើឡើងដោយមេបញ្ជាការទាហានស៊ីឈ្នួលរុស្ស៊ីលោកYevgeny Prigozhin និងក្រុមអ្នកប្រយុទ្ធក្រុមហ៊ុន Wagner របស់លោកនោះទេ។

លោក Naryshkin បានបញ្ជាក់ថា លោក Burns បានលើកឡើងពីព្រឹត្តិការណ៍នៅថ្ងៃទី២៤ ខែមិថុនា នៅពេលទាហានស៊ូឈ្នួល បានចូលគ្រប់គ្រងទីក្រុងរបស់រុស្ស៊ីភាគខាងត្បូង និងបានរុលចូលទៅកាន់ទីក្រុងមូស្គូ មុនពេលឈានដល់កិច្ចព្រមព្រៀងមួយជាមួយវិមានក្រឹមឡាំងដើម្បីបញ្ចប់ការធ្វើបដិវត្តន៍។ ប៉ុន្តែលោក បាននិយាយថា ការសន្ទនាតាមទូរស័ព្ទធ្វើឡើងមានរយៈពេលប្រហែល១ម៉ោង ដែលយើងបានពិចារណា និងបានពិភាក្សានូវអ្វីដែលបានធ្វើជាមួយប្រទេសអ៊ុយក្រែន។  

សហរដ្ឋអាមេរិក បានគាំទ្រដដែលៗ នូវគោលការណ៍នេះ ដែលបានចាត់ទុកថាគ្មានអ្វីពាក់ព័ន្ធអំពីអ៊ុយក្រែន គឺគ្មានអ៊ុយក្រែននៅក្នុងរឿងនេះនោះទេ។ លោក Burns និងលោក Naryshkin នៅតែមានខ្សែទូរស័ព្ទទំនាក់ទំនង ចាប់តាំងពីការចាប់ផ្តើមសង្គ្រាមនៅអ៊ុយក្រែនក្នុងពេលមួយនៅពេលដែលទំនាក់ទំនងផ្ទាល់ដ៏ទៃទៀតរវាងទីក្រុងមូស្គូ និងទីក្រុងវ៉ាស៊ីនតោនក្នុងកម្រិតទាប ហើយទំនាក់ទំនង ស្ថិតក្នុងចំណុចទាបបំផុត ចាប់តាំងពីវិបត្តិមីស៊ីលប្រទេសគុយបា ឆ្នាំ១៩៦២។