ភ្នំពេញ៖ ក្រុមហ៊ុន ភើណូដ រីខាដ (ខេមបូដ) ( Pernod Ricard Group) បន្តគាំទ្ររាជរដ្ឋាភិបាលទប់ស្កាត់ការរីករាលដាល នៃជំងឺកូវីដ-១៩ នៅក្នុងព្រះរាជាណាចក្រកម្ពុជា ព្រឹត្តិការណ៍សហគមន៍ ២០កុម្ភៈកន្លងទៅ បានធ្វើឲ្យកម្ពុជា មានអ្នកមានវីរុសកូវីដ-១៩ សរុបរហូតដល់ជាង ២ម៉ឺនករណី និងអ្នកបាត់បង់ជីវិតដោយសារមេរោគនេះ មានចំនួនលើសពី ១០០នាក់ គិតមកត្រឹមថ្ងៃនេះ។
នៅក្នុងពិធីប្រគល់-ទទួលអំណោយជាឧបករណ៍តេស្តកូវីដ-១៩ រហ័ស នាព្រឹកថ្ងៃទី១៧ ឧសភា ២០២១នេះ នាទីសី្តការក្រសួងសុខាភិបាល លោក ដារិន អុង អគ្គនាយកគ្រប់គ្រងក្រុមហ៊ុន ភើណូដ រីខាដ ខេមបូដ បានប្រគល់ឧបករណ៍តេស្តកូវីដរហ័ស Covid-19 Ag RAPID TEST DEVICE ដែលត្រូវបានទទួលស្គាល់ដោយក្រសួងសុខាភិបាល នៃព្រះរាជាណាចក្រកម្ពុជា ចំនួន១៦០តេស្តឃីត ស្មើនឹង ៤,០០០តេស្ត ជូនឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល ដើម្បីយកទៅឧបត្ថម្ភមន្ទីរពេទ្យបង្អែកទាំងអស់នៅទូទាំងប្រទេសកម្ពុជា។
នេះជាលើកទី២ហើយ ដែលក្រុមហ៊ុនបានជួយគាំទ្រដល់រាជរដ្ឋាភិបាលកម្ពុជា និងគណៈកម្មាធិការជាតិប្រយុទ្ធប្រឆាំងវីរុសកូវីដ-១៩ ក្នុងកិច្ចខិតខំប្រឹងប្រែងទប់ស្កាត់ ការចម្លង និងរីករាលដាលនៃវីរុសនេះ នៅក្នុងព្រះរាជាណាចក្រកម្ពុជា។
លោក ដារិន អុង អគ្គនាយកក្រុមហ៊ុនភើណូដ រីខាដ (ខេមបូដ) មានប្រសាសន៍ថា ដោយបានស្វែងយល់ច្បាស់អំពីស្ថានភាពបច្ចុប្បន្ននៃកូវីដ-១៩ នៅប្រទេសកម្ពុជា ឧបករណ៍តេស្តរហស័នេះ នឹងជួយសម្រួលដល់ការងាររបស់បុគ្គលិកពេទ្យជួរមុខ ពេទ្យស្ម័គ្រចិត្ត និងវេជ្ជបណ្ឌិត ឱ្យដំណើរការតេស្តកូវីដ-១៩ បានរហ័ស និងដឹងពីលទ្ធផលតេស្តបានលឿនជាងមុន ពីព្រោះឧបករណ៌នេះ ត្រូវបានបង្កើតឡើង និងប្រើប្រាស់នូវបច្ចេកវិជ្ជាទំនើប ដើម្បីពន្លឿនល្បឿនតេស្ត ប្រកបដោយភាពត្រឹមត្រូវ គុណភាព និងសុវត្ថិភាព។ ក្នុងនាមជាធុរៈកិច្ចដែលផ្តោតចំបងលើនិរន្តរភាព និងទំនួលខុសត្រូវ ភើណូដ រីខាដ ហ្គ្រុប (Pernod Ricard Group) និងក្រុមហ៊ុនបុត្រសម្ព័ន្ធរបស់ខ្លួន នៅជុំវិញពិភពលោក បានផ្ដួចផ្ដើមនូវគំនិត ដែលរួមចំណែកដល់កិច្ចខិតខំប្រឹងប្រែងរបស់រាជរដ្ឋាភិបាលក្នុងស្រុកក្នុងគ្រាលំបាកនេះ។
លោក ដារិន អុង សង្ឃឹមថា ការចូលរួមចំណែករបស់ក្រុមហ៊ុននៅថ្ងៃនេះ អាចជួយដល់រាជរដ្ឋាភិបាលកម្ពុជា និងក្រសួងសុខាភិបាល ក្នុងការងារដ៏សំខាន់របស់ខ្លួន ដើម្បីទប់ស្កាត់ការរីករាលដាលបន្ថែមនៃជំងឺកូវីដ-១៩ នៅក្នុងព្រះរាជាណាចក្រកម្ពុជា ហើយគំនិតផ្តួចផ្តើមទាំងនេះពិតជាការឆ្លុះបញ្ចាំងឱ្យឃើញអំពីស្មារតីរួសរាយរាក់ទាក់ ដែលស្ថិតនៅចំណុចកណ្តាលនៃបេះដូងរបស់ ភើណូដ រីខាដ ហ្គ្រុប នោះគឺវប្បធម៌នៃការថែរក្សាគ្នាទៅវិញទៅមក។
ឯកឧត្ដមសាស្ត្រចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានសម្តែងនូវការកោតសរសើរ និងថ្លែងអំណរគុណលោក ដារិន អុង អគ្គនាយកក្រុមហ៊ុនភើណូដ រីខាដ (ខេមបូដ) ដែលបានប្រគល់អំណោយឧបករណ៌តេស្តកូវីដ-១៩ រហ័ស។
ការប្រើប្រាស់ឧបករណ៍តេស្តរហ័ស ដើម្បីធ្វើតេស្តរកមេរោគកូវីដ-១៩ សំរាប់គ្រប់អ្នកជំងឺទាំងអស់ នៅពេលចូលទៅកាន់មណ្ឌលសុខភាព គឺជានីតិវិធីប្រតិបតិ្តការស្តង់ដារមួយ ដើម្បីការពារ និងត្រួតត្រាការរីករាលដាលនៃជំងឺកូវីដ១៩។
ជាពិសេស ដើម្បីបង្កើនប្រសិទ្ធភាពសេវាសុខភាព និងធានាបាននូវភាពទៀងទាត់ នៅមន្ទីរពេទ្យរដ្ឋ ក្រសួងសូមណែនាំ អោយគ្រប់មន្ទីរពេទ្យទាំងអស់ ប្រើប្រាស់តេស្តរហ័ស ដើម្បីធ្វើតេស្តកូវីដ-១៩ និងដាក់អ្នកជំងឺដោយឡែក បើចាំបាច់៕ អត្ថបទ៖ រដ្ឋា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
