រដ្ឋមន្ត្រីការបរទេសឥណ្ឌូណេស៊ី លោកស្រី Retno Marsudi បានប្រដូចភាពតានតឹងភូមិសាស្ត្រនយោបាយនៅឥណ្ឌូ-ប៉ាស៊ីហ្វិកថាជា "សង្រ្គាមត្រជាក់នៅក្នុងទីក្តៅ" ក្នុងអំឡុងពេលកិច្ចប្រជុំកំពូលអាស៊ីបូព៌ាប្រចាំឆ្នាំនៅទីក្រុងហ្សាកាតានៅថ្ងៃសុក្រ (១៤ កក្កដា)នេះ។

ដោយថ្លែងទៅកាន់សមាគមប្រជាជាតិអាស៊ីអាគ្នេយ៍ (អាស៊ាន) ដែលមានសមាជិកទាំង១០ប្រទេស និងដៃគូសន្ទនារបស់ខ្លួនលោកស្រី Retno ក៏បានសង្កត់ធ្ងន់លើស្ថិរភាព និងសន្តិភាពនៅក្នុងតំបន់ ដោយជំរុញឱ្យប្រទេសនានាកុំធ្វើឱ្យតំបន់ឥណ្ឌូ-ប៉ាស៊ីហ្វិកប្រែក្លាយជា "សមរភូមិសង្រ្គាម" មួយផ្សេងទៀតឡើយ។

ក្រៅពីរដ្ឋមន្ត្រីការបរទេសទីម័រខាងកើត ដែលត្រូវបានអនុម័តជាគោលការណ៍ជាសមាជិកទី១១របស់ក្រុមនេះ មានវត្តមាននៅក្នុងកិច្ចប្រជុំ ក៏មានប្រមុខការទូតជាច្រើនមកពីប្រទេសចិន ជប៉ុន កូរ៉េខាងត្បូង ឥណ្ឌា អូស្ត្រាលី និងនូវ៉ែលហ្សេឡង់ផងដែរ។

កិច្ចប្រជុំប្រចាំឆ្នាំដែលធ្វើឡើងនៅទីក្រុងហ្សាកាតាក្នុងឆ្នាំនេះ ក៏រួមបញ្ចូលនូវមហាអំណាចធំៗដូចជាចិន និងរុស្ស៊ីផងដែរ ហើយធ្វើឡើងនៅពេលដែលការសង្ស័យលើភាពជឿជាក់ និងការរួបរួមរបស់ប្លុកក្នុងការដោះស្រាយបញ្ហាប្រឈមដ៏គ្រោះថ្នាក់បំផុតក្នុងតំបន់នេះមានការកើនឡើង៕