កាលពីថ្ងៃព្រហស្បតិ៍ម្សិលមិញ ភ្ញៀវទេសចររាប់ពាន់នាក់ នាំគ្នាត្អូញត្អែរពីអាកាសធាតុក្តៅខ្លាំងបំផុតនៅទីក្រុងអាតែន ពេលដែលពួកគេតម្រង់ជួរចូលទស្សនាបន្ទាយបុរាណដ៏ល្បីល្បាញបំផុត Acropolis របស់ប្រទេសក្រិក ក្នុងនោះក្រុមការងារសុខាភិបាល បានព្យាបាលភ្ញៀវសម្រាប់ស្ថានភាពសុខភាពខុសប្លែកគ្នាជាច្រើន ពេលដែលរលកកម្តៅប្រចាំរដូវកាលវាយប្រហារប្រទេសមួយនេះ ។  

រថយន្តគិលានសង្រ្គោះ បាននៅក្រោមបន្ទាយដើម្បីចាំជួយសង្រ្គោះភ្ញៀវទេសចរផងដែរ ហើយក្រុមការងារកាកបាទក្រហម Hellenicបានរៀបចំអង្គភាពចល័តនៅជាប់នឹងបន្ទាយបុរាណ ដើម្បីផ្តល់ជាដបទឹក និងខិត្តប័ណ្ណណែនាំ ។  

 ក្រុមការងារនិយាយថា មនុស្សយ៉ាងហោច ២០នាក់ ទទួលបានការព្យាបាលសម្រាប់អាក្ការៈដួលសន្លប់ វិលមុខ និងក្អួតចង្អោរ ។  

លោក Marina Stamati គឺជាអ្នកតំណាងកាកបាទក្រហម និយាយថា ភ្ញៀវទេសចរម្នាក់ បានដួលសន្លប់ ហើយត្រូវបាននាំចុះពីលើបន្ទាយនៅលើភ្នំ ទៅកាន់រថយន្តគិលានសង្រ្គោះដែលរង់ចាំនៅក្រោម ។ រនាំងត្រូវបានដំឡើងនៅច្រកចូលដើម្បីផ្តល់ម្លប់បន្ថែមទៀតដល់ភ្ញៀវទេសចរ ។  

ការសិក្សាមួយដោយក្រុមអ្នកស្រាវជ្រាវមកពីវិទ្យាស្ថានសុខភាពអឺរ៉ុប បានប៉ាន់ស្មានថា មនុស្សជាង ៦១.៦០០នាក់ បានស្លាប់ដោយសារតែមូលហេតុពាក់ព័ន្ធនឹងកម្តៅទូទាំង ៣៥ប្រទេសនៅអឺរ៉ុប ចាប់ពីចុងខែឧសភា រហូតដល់ដើមខែកញ្ញាឆ្នាំ ២០២២កន្លងទៅ អំឡុងពេលរដូវក្តៅក្តៅខ្លាំងបំផុតនៅអឺរ៉ុប ក្នុងនោះប្រទេសក្រិក អ៊ីតាលី និងអេស្ប៉ាញ មើលឃើញអត្រាស្លាប់មនុស្សខ្ពស់បំផុត ៕