កិច្ចប្រជុំអាស៊ីបូព៌ា របស់រដ្ឋមន្ត្រីការបរទេសមកពីសមាគមប្រជាជាតិអាស៊ីអាគ្នេយ៍ និងប្រទេសមហាអំណាចពិភពលោកផ្សេងទៀត កំពុងដំណើរការនៅក្នុងទីក្រុងហ្សាកាតា ប្រទេសឥណ្ឌូនេស៊ី។ ដោយមានការចូលរួមពីប្រទេសជប៉ុន សហរដ្ឋអាមេរិក រុស្ស៊ី និងបណ្តាប្រទេសតំបន់អាស៊ី-ប៉ាស៊ីហ្វិក ក្រុមរដ្ឋមន្ត្រីអាស៊ានកំពុងជួបប្រជុំគ្នាដើម្បីពិភាក្សាដោយផ្តោតសំខាន់លើបញ្ហាតំបន់។ បច្ចុប្បន្នការយកចិត្តទុកដាក់ គឺនៅលើបញ្ហាថាតើប្រជាជាតិអាស៊ីអាគ្នេយ៍នឹងដោះស្រាយជម្លោះរវាងប្រទេសមហាអំណាចធំៗរបស់ពិភពលោកដោយរបៀបណា។ 

រដ្ឋមន្ត្រីការបរទេសជប៉ុន លោក Hayashi Yoshimasa រដ្ឋមន្ត្រីការបរទេសសហរដ្ឋអាមេរិក លោក Antony Blinken រដ្ឋមន្ត្រីការបរទេសរុស្ស៊ីលោក Sergey Lavrov និងអ្នកការទូតជាន់ខ្ពស់របស់ចិន លោក Wang Yi បានចូលរួមជាមួយប្រមុខការបរទេសអាស៊ាន សម្រាប់កិច្ចពិភាក្សាទល់មុខគ្នា ស្តីពីស្ថានភាពតំបន់។ អ្នកចូលរួមត្រូវបានគេរំពឹងថា នឹងជជែកដេញដោលដ៏ក្តៅគគុកស្តីពីសកម្មភាពដែនសមុទ្ររបស់ប្រទេសចិន នៅសមុទ្រចិនខាងត្បូង និងខាងកើត និងសម្ពាធយោធាដែលកំពុងកើនឡើងរបស់ប្រទេសនេះទៅលើកោះតៃវ៉ាន់ និងការវាយលុករបស់រុស្ស៊ីលើអ៊ុយក្រែន។ 

វេទិកាប្រចាំតំបន់អាស៊ាន នឹងត្រូវធ្វើឡើងផងដែរនៅល្ងាចថ្ងៃសុក្រដើម្បីពិភាក្សាពីបញ្ហាសន្តិសុខតំបន់អាស៊ី-ប៉ាស៊ីហ្វិក។

អ្នកតំណាងមកពីប្រទេសនិងតំបន់ចំនួន២៧ រួមទាំងប្រទេសជប៉ុន សហរដ្ឋអាមេរិក ចិន រុស្ស៊ី និងប្រទេសកូរ៉េខាងជើងត្រូវបានរំពឹងថានឹងចូលរួម។ ប្រធានបទនៃកិច្ចពិភាក្សាទំនងជានឹងរួមមានការបាញ់សាកល្បងរបស់ប្រទេសកូរ៉េខាងជើងកាលពីថ្ងៃពុធ នូវអ្វីដែលប្រទេសនេះនិយាយថា ជាមីស៊ីលបាលីស្ទីកអន្តរទ្វីប(ICBM)។