ភ្នំពេញ៖ គណៈកម្មាធិការចម្រុះកិច្ចការព្រំដែន នៅថ្ងៃទី ១៤ ខែកក្កដា ឆ្នាំ២០២៣នេះ បានថ្លែងការណ៍ប្រកាស​ទាត់ចោលទាំងស្រុងនូវការចេញផ្សាយតាមបណ្តាញសង្គមដែលមាននិន្នាការប្រឆាំងរាជរដ្ឋាភិបាល និង​គណនីហ្វេសប៊ុកឈ្មោះ ទូរទស្សន៍ ព្រះអាទិត្យកម្ពុជា ដែលបានបង្ហោះវីដេអូមានចេតនាបង្កើត ប្រឌិតរឿង និងផ្សព្វផ្សាយព័ត៌មានក្លែងក្លាយ ទាក់ទងនឹងព្រំដែន-កម្ពុជាវៀតណាម ក្នុងគោលដៅញុះញង់​ប្រជាពលរដ្ឋក្នុង​កំឡុងពេលជិតបោះឆ្នោត ដើម្បីបំភាន់សាធារណៈមតិជាតិ និងអន្តរជាតិ ។

​យោងតាមសេចក្តីថ្លែងការណ៍របស់គណៈកម្មាធិការចម្រុះកិច្ចការព្រំដែននៅថ្ងៃទី១៤ ខែកក្កដានេះ ដោយ​ប្រកាសទាត់​ចោល​ទាំងស្រុងនូវការចេញផ្សាយ តាមបណ្តាញសង្គមដែលមាននិន្នាការប្រឆាំងនិងរាជរដ្ឋាភិបាល និងគណនីហ្វេសប៊ុកឈ្មោះ ទូរទស្សន៍ ព្រះអាទិត្យកម្ពុជា (Cambodia SUNTV) បានបង្ហោះវីដេអូ នាថ្ងៃទី៩ ខែកក្កដា ឆ្នាំ២០២៣ ដោយភ្ជាប់ ខ្លឹមសារថា «វៀតណាមបានបង្ខិតបង្គោលព្រំដែនចូលទឹកដីកម្ពុជា»។

គណៈកម្មាធិការចម្រុះកិច្ច ការព្រំដែន បញ្ជាក់ថា ការផ្សព្វផ្សាយព័ត៌មានរបស់ បណ្តាញសង្គមដែលមាន​និន្នាការ​ប្រឆាំងនិងរាជរដ្ឋាភិបាល និងគណនីហ្វេសប៊ុកឈ្មោះ ទូរទស្សន៍ ព្រះអាទិត្យកម្ពុជា គឺមានចេតនាបង្កើត ប្រឌិតរឿង និងផ្សព្វផ្សាយព័ត៌មានក្លែងក្លាយ ក្នុង គោលដៅញុះញង់ប្រជាពលរដ្ឋក្នុងកំឡុងពេលជិតបោះឆ្នោត ដើម្បីបំភាន់​សាធារណៈមតិជាតិ និងអន្តរជាតិ ដោយធ្វើការចោទប្រកាន់ គ្មានមូលដ្ឋានមកលើការងារ​ព្រំដែនរបស់រាជរដ្ឋាភិបាល​កម្ពុជា អំពីការធ្វើឱ្យបាត់បង់ទឹកដី ក៏ដូចជាការបណ្ដោយឱ្យមានការរំលោភបំពានទឹកដីពី​ប្រទេសជិតខាងធ្វើ​ឱ្យ​ប្រជាពលរដ្ឋ​បាត់បង់ដីស្រែចំការ ។ល។

គណៈកម្មាធិការចម្រុះកិច្ចការព្រំដែន បញ្ជាក់ជូនជាថ្មីថា ក្នុងកិច្ចការងារខណ្ឌសីមា និងបោះបង្គោលព្រំដែនរវាង​ព្រះរាជាណាចក្រកម្ពុជា ជាមួយនឹងសាធារណរដ្ឋសង្គមនិយមវៀតណាម ក៏ដូចជាជាមួយនឹង​ប្រទេសជិតខាង​ផ្សេងៗទៀត ក្រោមការដឹកនាំដ៏ត្រឹមត្រូវ និងឈ្លាសវៃបំផុតរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាធ្វើបានត្រឹមត្រូវ ម៉ត់ចត់ និងច្បាស់លាស់បំផុត ដើម្បីរក្សាបាន​ផ្ទៃក្រឡាដី​កម្ពុជា ១៨១ ០៣៥ គីឡូម៉ែត្រក្រឡា ដូចបានកំណត់ច្បាស់នៅក្នុងរដ្ឋធម្មនុញ្ញនៃព្រះរាជាណាចក្រកម្ពុជា។

គណៈកម្មាធិការចម្រុះកិច្ចការព្រំដែន ប្រកាសបដិសេធចោលទាំងស្រុង​នូវការផ្សព្វផ្សាយព័ត៌មាន​ខុសពីការពិត​ទាំងនោះ និងសូមអំពាវនាវដល់ជនរួមជាតិទាំងក្នុង និងក្រៅប្រទេស សូមកុំជឿ និងកុំចែកចាយ​រាល់ព័ត៌មាន​ក្លែងក្លាយរបស់ជនអគតិ ដែលមានចេតនាទុច្ចរិត វាយប្រហារដល់កិច្ចការ ព្រំដែនរបស់​រាជរដ្ឋាភិបាល​កម្ពុជា ហើយដែលសកម្មភាពទាំងអស់នោះ អាចនឹងប្រឈមមុខនឹងផ្លូវច្បាប់។

គណៈកម្មាធិការចម្រុះកិច្ចការព្រំដែន ក៏បានអំពាវនាវផងដែរដល់អាជ្ញាធរមានសមត្ថកិច្ច សូមចូលរួមស្រាវជ្រាវ ទប់ស្កាត់ និងចាត់វិធានការតាមផ្លូវច្បាប់ទៅលើជនខិលខូចទាំងឡាយណា ដែល មានចេតនាបង្កើតព័ត៌មាន​ក្លែងក្លាយទាំងនេះ ទៅតាមផ្លូវច្បាប់ជាធរមាន៕ ដោយ ៖ វ៉ន ដារ៉ា