ឯកអគ្គរដ្ឋទូតចិនប្រចាំចក្រភពអង់គ្លេស លោក Zheng Zeguang( ចឹង ហ្សើគ័ង) កាលពីថ្ងៃព្រហស្បតិ៍ បានធ្វើការរិះគន់ដល់មន្ត្រីកិច្ចការបរទេសអង់គ្លេសជាច្រើន ជុំវិញពាក្យសម្ដីខុសឆ្គងរបស់បណ្ដាមន្ត្រីចក្រភពអង់គ្លេសទាំងនោះ លើចំណាត់ការអនុវត្តច្បាប់របស់នគរបាលតំបន់រដ្ឋបាលពិសេសហុងកុង (HKSAR) លើក្រុមអ្នកប្រឆាំងប្រទេសចិន។

នៅក្នុងសេចក្តីថ្លែងការណ៍មួយដែលបានចេញផ្សាយនៅលើគេហទំព័រស្ថានទូតកាលពីថ្ងៃព្រហស្បតិ៍ លោក Zheng បានសម្តែងការមិនពេញចិត្តយ៉ាងខ្លាំង និងការប្រឆាំងយ៉ាងម៉ឺងម៉ាត់ចំពោះពាក្យសម្ដី និងសកម្មភាពខុសរបស់មន្ត្រីចក្រភពអង់គ្លេសលើបញ្ហាទាក់ទងនឹងហុងកុង។

លោកបានសង្កត់ធ្ងន់ថា ភាគីចក្រភពអង់គ្លេសគ្មានតួនាទី និងគ្មានសិទ្ធិលើកឡើងដោយខ្វះការទទួលខុសត្រូវ លើចំណាត់ការអនុវត្តច្បាប់របស់នគរបាលតំបន់រដ្ឋបាលពិសេសហុងកុង HKSAR នោះទេ ហើយបានជំរុញឱ្យចក្រភពអង់គ្លេសទទួលបានការយល់ដឹងច្បាស់លាស់អំពីស្ថានភាព កែកំហុសរបស់ខ្លួន និងបញ្ឈប់ការជ្រៀតជ្រែកក្នុងកិច្ចការពាក់ព័ន្ធនឹងទីក្រុងហុងកុង ព្រមទាំងកិច្ចការផ្ទៃក្នុងរបស់ចិនផងដែរ។

លោកឯកអគ្គរដ្ឋទូតបានសង្កត់ធ្ងន់ផងដែរថា ចក្រភពអង់គ្លេសមិនមានអធិបតេយ្យភាព យុត្តាធិការ ឬសិទ្ធិនៃ "ការត្រួតពិនិត្យ" លើទីក្រុងហុងកុងទេ បន្ទាប់ពីទីក្រុងនេះវិលត្រឡប់ទៅក្រោមការគ្រប់គ្រងរបស់ប្រទេសចិនវិញនោះ៕