ភ្នំពេញ៖ ប្រជាពលរដ្ឋក្មេង ចាស់ ប្រុស ស្រី រស់នៅក្នុងមូលដ្ឋានខណ្ឌទួលគោក នាថ្ងៃទី២៣ ខែកក្កដា ឆ្នាំ២០២៣ខាងមុខនេះ ប្តេជ្ញារួមគ្នាទៅបោះឆ្នោតជូនគណបក្សប្រជាជនកម្ពុជា នៅលេខរៀងទី១៨ គឺដើម្បីសន្តិភាព និងការអភិវឌ្ឍ។

ការលើកឡើងរួមគ្នារបស់ប្រជាពលរដ្ឋយ៉ាងដូច្នេះ នាឱកាសដែល​ក្រុម​ការងារ​ចុះ​ជួយ​ខណ្ឌ​ទួលគោក បើកយុទ្ធនាការដង្ហែក្បួនលើកទី៣ នៃការឃោសនាបោះឆ្នោត​ជ្រើស​តាំង​តំណាង​រាស្រ្ត​នីតិកាល​ទី៧ ក្នុងភូមិសាស្រ្តសង្កាត់ទាំង១០ ខណ្ឌទួលគោក នាព្រឹកថ្ងៃទី១៥ ខែកក្កដា ឆ្នាំ២០២៣​នេះ។

បងប្អូនប្រជាពលរដ្ឋ រួមនឹងសមាជិក សមាជិកា បានឈរទទួលស្វាគមន៍ ការដង្ហែ​ក្បួន​របស់​គណបក្ស​ប្រជាជនកម្ពុជា ខណ្ឌទួលគោក ដោយទឹកមុខសប្បាយរីករាយ រួមនឹងសំឡេង​ជ័យ​ឃោស ជាមួយថ្នាក់ដឹកនាំ ដោយប្រកាសគាំទ្រសម្តេចតេជោ ហ៊ុន សែន ជានាយករដ្ឋមន្រី្ត និង​ឯក​ឧត្តមបណ្ឌិត ហ៊ុន ម៉ាណែត ជាបេក្ខភាពនាយករដ្ឋមន្រី្ត បន្តវេននាពេលអនាគត ដើម្បី​បន្ត​ដឹកនាំ​នាវា​កម្ពុជា ក្នុងសុខសន្តិភាព ស្ថិរភាព និងការអភិវឌ្ឍ។

សូមបញ្ជាក់ផងដែរថា គណបក្សប្រជាជនកម្ពុជា ប្តេជ្ញា​អនុវត្ត​កម្ម​វិធី​នយោបាយ​ដែល​បាន​ប្រកាស​ជូន​ជនរួមជាតិឲ្យបានសម្រេចជោគជ័យ បង្កើតសមិទ្ធផលធំៗថ្មីៗទៀតជូនជាតិ និងធ្វើឲ្យ​ប្រជាជន​មាន​ជីវភាពកាន់តែសម្បូរសប្បាយ រស់នៅយ៉ាងសុខដុមរមនាក្នុងសង្គម ប្រកបដោយ​ការ​គោរព​តម្លៃ​មនុស្ស ប្រជាធិបតេយ្យ សេរីភាព យុតិ្តធម៌៕ អត្ថបទ រដ្ឋា