ប្រធានគណៈកម្មាធិការ គណបក្សប្រជាជនកម្ពុជា ខណ្ឌបឹងកេងកង ស្នើសុំឱ្យប្រជាពលរដ្ឋត្រៀម​ឯកសារ​ឲ្យគ្រប់ សម្រាប់ទៅបោះឆ្នោតតំណាងរាស្រ្ត និតិកាលទី៧ ឆ្នាំ២០២៣ ដែលនឹង ចូលមក​ដល់នាថ្ងៃទី២៣ ខែកក្កដា ឆ្នាំ២០២៣ ។

លោក សុខ សម្បត្តិ ប្រធានគណៈកម្មាធិការគណបក្សប្រជាជនកម្ពុជា ខណ្ឌបឹងកេងកង បាន​រំលឹក​ដល់​បងប្អូនប្រជាពលរដ្ឋដែលរស់នៅក្នុងរាជធានីភ្នំពេញ ពិសេសក្នុងខណ្ឌបឹងកេងកង​ទាំងអស់​ត្រៀម​ឯកសារឱ្យបានរួចរាល់ ដូចជា អត្តសញ្ញាណប័ណ្ណ ហើយបើគ្មាន​អត្ត​សញ្ញាណ​បណ្ណទេ សុំទៅធ្វើ ឯ.អ ទុកជាមុន ព្រោះនេះជាការជ្រើសរើសមេដឹកនាំដែលបងប្អូនពេញចិត្ត។

ការរំលឹករបស់លោក សុខ សម្បត្តិ បានធ្វើឡើងក្នុងពេលប្រគុំតន្រ្តីអបអរសាទរ ក្នុង​យុទ្ធនា​ការ​បោះឆ្នោត​ជ្រើស​រើសតំណាងរាស្រ្ត និតិកាលទី៧ ឆ្នាំ២០២៣ ដែលរៀបចំដោយតារាកំប្លែងនាយ កុយ កាលពីរាត្រីថ្ងៃទី១៤ ខែកក្កដាម្សិលមិញ ដោយមានការចូលរួមទស្សនាពីសមាជិក សមាជិកាបក្ស និង ប្រជាពលរដ្ឋយ៉ាងច្រើនកុះករ។

លោកប្រធានគណៈកម្មាធិការគណបក្សប្រជាជនកម្ពុជា ខណ្ឌបឹងកេងកង បានរំលឹកទៀតថា ការ​បោះឆ្នោត​ជ្រើសរើសមេដឹកនាំប្រទេស ពិតជាសំខាន់ណាស់សម្រាប់ប្រជាពលរដ្ឋគ្រប់រូប ដែលត្រូវ​ការ​អ្នក​ដឹកនាំប្រទេសដែលខ្លួនពេញចិត្ត ហើយអាច​ធ្វើ​ឱ្យ​មាន​ការ​អភិវឌ្ឍ​រីក​ចម្រើន​បាន​តទៅ​ទៀត​។

លោកបានបញ្ជាក់ទៀតថា មានតែបក្សបក្សនយោបាយតែមួយគត់ គឺ គណបក្សប្រជាជនកម្ពុជា ដែល​បានរំដោះជីវិតយើងចេញពីរបបវាលពិឃាដយង់ឃ្នង ហើយបាន​ដឹកនាំ​ប្រទេស​ឱ្យ​មាន​ការ​រីកចម្រើន​ដូច​សព្វថ្ងៃ ជាពិសេសគឺរក្សាបាននូវសុខសន្តិភាព ស្ថេរភាពនយោបាយ និង មានការ​អភិវឌ្ឍ​លើ​គ្រប់វិស័យ និងបានធ្វើឱ្យកម្ពុជាឈខ្ពស់ស្មើមុខស្មើមាត់នៅលើឆាកអន្តរជាតិ ក៏ដូចជា​ធ្វើ​ឱ្យ​ពិភពលោកទទួលស្គាល់ និងគាំទ្រកម្ពុជាកាន់តែច្រើនឡើងជាបន្តបន្ទាប់​។

ជាមួយគ្មានេះលោក សុខ សម្បត្តិ ស្នើឱ្យប្រជាពលរដ្ឋ ដែលស្រលាញ់សុខសន្តិភាពទាំងអស់ ទៅ​បោះឆ្នោត​នៅថ្ងៃទី២៣ ខែកក្កដា ឆ្នាំ២០២៣ខាងមុខនេះឱ្យបានគ្រប់ៗគ្នា និងបោះឆ្នោត​ជូន​គណបក្ស​ប្រជាជនកម្ពុជា ដែលមានលេខរៀងទី១៨ ក្នុងសន្លឹកឆ្នោត ដើម្បីផ្តល់លទ្ធភាព​ជូន​សម្តេចតេជោ ហ៊ុន សែន បន្តបំរើបងប្អូន និងបន្ត​ដឹកនាំ​ប្រទេស​ឱ្យ​កាន់​តែ​រីក​ចម្រើន​លើ​គ្រប់​វិស័យ​ជា​បន្ត​ទៅទៀត៕ អត្ថបទ៖ តារាវុទ្ធី