អ្នកនាំពាក្យអង្គការសហប្រជាជាតិបាននិយាយកាលពីថ្ងៃសុក្រថា អគ្គលេខាធិការ​អង្គការ​សហប្រជាជាតិ លោក Antonio Guterres នៅតែរង់ចាំការឆ្លើយតបពីប្រធានាធិបតីរុស្ស៊ី លោក Vladimir Putin លើសំណើ​ ដើម្បី​បន្ថែម​ពេលកិច្ច​ព្រម​ព្រៀងដែល​អនុញ្ញាត​ឱ្យ​មាន​ការ​នាំចេញ​គ្រាប់​ធញ្ញជាតិ​អ៊ុយក្រែន ដោយសុវត្ថិភាពនៅសមុទ្រខ្មៅឲ្យហួសពីថ្ងៃច័ន្ទ។ ប្រភពជាច្រើនបានប្រាប់សារព័ត៌មានរ៉យទ័រថា លោក Guterres បានសរសេរទៅកាន់លោក Putin កាលពីថ្ងៃអង្គារ ដោយស្នើសុំឱ្យលោកបន្ថែមពេលកិច្ចព្រមព្រៀងនៅសមុទ្រខ្មៅ ជាថ្នូរ សម្រាប់​ការ​ភ្ជាប់ក្រុមហ៊ុនធនាគារកសិកម្មរុស្ស៊ី (Rosselkhozbank) ទៅនឹងប្រព័ន្ធ​ទូទាត់​ប្រាក់​អន្តរជាតិ SWIFT ។

នាវាចុងក្រោយដែលធ្វើដំណើរក្រោមកិច្ចព្រមព្រៀងសមុទ្រខ្មៅកំពុងផ្ទុកទំនិញរបស់ខ្លួននៅកំពង់ផែ Odesa ប្រទេសអ៊ុយក្រែន។ រុស្ស៊ី ពុំបានព្រមព្រៀងចុះបញ្ជីនាវាថ្មីៗណាមួយនោះទេ ចាប់​តាំង​ពី​ថ្ងៃ​ទី២៧ ខែមិថុនា ហើយគំនិតផ្តួចផ្តើមនោះនឹងត្រូវផុតកំណត់នៅថ្ងៃចន្ទ ប្រសិនបើទីក្រុងមូស្គូ មិន​ព្រមព្រៀងបន្តនោះ។ រុស្ស៊ី បានគំរាមដកខ្លួនចេញពីកិច្ចព្រមព្រៀង ដែល​សម្រប​សម្រួល​ដោយ​អង្គការ​សហប្រជាជាតិ និងប្រទេសទួរគី កាលពីខែកក្កដា ឆ្នាំ២០២២ ដោយសារ​ទីក្រុង​មូស្គូ​និយាយ​ថា ការទាមទាររបស់ខ្លួនដើម្បីធ្វើឲ្យប្រសើរការនាំចេញគ្រាប់ធញ្ញជាតិ និងជីរបស់ខ្លួន មិន​ត្រូវ​បានបំពេញ។

ពោត ស្រូវសាលី និងធញ្ញជាតិផ្សេងទៀតជាង ៣២ លានតោន ត្រូវបាន​នាំ​ចេញ​ដោយ​អ៊ុយក្រែន​ក្រោម​ការ​រៀបចំ។ រុស្ស៊ីបានត្អូញត្អែរថា មិនគ្រប់គ្រាន់នោះទេ ដែលបានទៅដល់ប្រទេសក្រីក្រ ប៉ុន្តែ​អង្គការសហប្រជាជាតិបានអះអាងថា ខ្លួនបាន​ផ្តល់​ផល​ប្រយោជន៍​ដល់រដ្ឋ​ទាំង​នោះ​ តាម​រយៈ​ការ​ជួយបញ្ចុះតម្លៃស្បៀងអាហារជាង ២០ ភាគរយនៅទូទាំងពិភពលោក៕