រដ្ឋមន្ត្រីការបរទេសកូរ៉េខាងត្បូង លោក Park Jin បានជំរុញឱ្យប្រទេសចិន ដើរតួនាទីស្ថាបនា ក្នុងការដោះស្រាយជាមួយប្រទេសកូរ៉េខាងជើង បន្ទាប់​ពីការបាញ់​មីស៊ីលចុង​ក្រោយ​របស់​ទីក្រុង​ព្យុង​យ៉ាង។

លោក Park បានថ្លែងដូច្នេះ ក្នុងអំឡុងពេលជួបជាមួយអ្នកការទូតកំពូលរបស់ប្រទេសចិន លោក Wang Yi កាលពីថ្ងៃសុក្រ នៅក្នុងទីក្រុងហ្សាកាតា ប្រទេសឥណ្ឌូនេស៊ី។ ភាគគីទាំងពីរ បាន​ពិភាក្សា​នៅ​ខាងក្រៅវេទិកាដែលរៀបចំដោយសមាគមប្រជាជាតិអាស៊ីអាគ្នេយ៍ និងប្រទេស​ដទៃ​ទៀត​។

ក្រសួងការបរទេសកូរ៉េខាងត្បូង បាននិយាយថា លោក Park បានរិះ​គន់​កូរ៉េ​ខាង​ជើង​ចំពោះ​ការ​បាញ់ នូវអ្វី​ដែល​ទីក្រុងព្យុងយ៉ាង​និយាយថា​ ជា​មីស៊ីល​បាលីស្ទីក​អន្តរ​ទ្វីប​កាល​ពីថ្ងៃ​ពុធ​កន្លង​ទៅ​នេះ។ ក្រសួងបាននិយាយថា លោក Park បានបញ្ជាក់ថា វាមាន​សារៈ​សំខាន់​ជាង​ពេលណាៗ​ទាំង​អស់​ សម្រាប់​ប្រទេសចិនក្នុងការដើរតួនាទីស្ថាបនាក្នុងសន្តិភាព និងស្ថិរភាព​នៅ​លើ​ឧបទ្វីប​កូរ៉េ ដោយទីក្រុងប៉េកាំងមានទំនាក់ទំនងជិតស្និទ្ធជាមួយទីក្រុងព្យុងយ៉ាង។ តាម​សេចក្តី​រាយ​ការណ៍ អ្នកការទូតទាំងពីររូប បានព្រមព្រៀងគ្នាជំរុញការចរចានៅលើគ្រប់កម្រិត។

អ្នក​ការទូតទាំងពីររូប បាននិយាយថា​នឹង​ធ្វើ​ការ​ឆ្ពោះទៅ​រក​ការ​សម្រេច​បាន​នូវ​កិច្ច​ប្រជុំ​កំពូល​ត្រីភាគី និងកិច្ចប្រជុំដ៏ទៃទៀតជាមួយប្រទេសជប៉ុន ហើយ​បានបញ្ជាក់​លើ​សារៈ​សំខាន់​ នៃ​កិច្ច​សហប្រតិបត្តិការ សម្រាប់​សន្តិភាព និងស្ថិរភាពក្នុងតំបន់។

ទំនាក់ទំនងរវាងទីក្រុងសេអ៊ូល និងទីក្រុងប៉េកាំង មានភាពប្រះឆាចាប់តាំងពីខែមិថុនា នៅពេល​ដែល​ប្រទេសចិន បានរិះគន់ទំនាក់ទំនងរបស់ប្រទេសកូរ៉េខាងត្បូង ជាមួយសហរដ្ឋអាមេរិក៕