នគរបាលបានល្បាតនៅតាមដងផ្លូវនានាក្នុងទីក្រុងប៉ារីស កាលពីល្ងាចថ្ងៃសុក្រ ក្នុង​កិច្ច​ប្រឹងប្រែង ដើម្បី​ការពារ​ការប្រារព្ធទិវាជាតិបារាំង (Bastille Day ) ជាប្រពៃណី​របស់​ប្រទេស​បារាំង​មិន​ឲ្យ​ផ្ទុះ​កុបកម្ម​ឡើង​វិញ​ដែលបានធ្វើឲ្យរង្គោះរង្គើរប្រទេស កាលពីចុងខែមិថុនា។ នៅទីក្រុងប៉ារីសភាគកណ្តាល នគរបាលអាចមើលឃើញនៅជិតប៉មទួអ៊ីហ្វែល ជាកន្លែង​ដែល​ពលរដ្ឋ​ទីក្រុង​ប៉ារីសប្រមូលផ្តុំគ្នាដើម្បីមើលកាំជ្រួចភ្ញី។

សន្តិសុខត្រូវបានរឹតបន្តឹង នៅតំបន់ជាយក្រុង Nanterre(ណង់ទែរ) ដែលនៅក្បែរនោះ ជាកន្លែង​ដែល​នគរបាល​បានសម្លាប់ក្មេងជំទង់ម្នាក់កាលពីថ្ងៃទី ២៧ ខែមិថុនា បានបង្កឱ្យ​មាន​រលក​អំពើ​ហឹង្សា​ក្នុង​ទីក្រុងនៅទូទាំងប្រទេស ជាកុបកម្មនៅ​ក្នុង​ទីក្រុង​ដ៏​អាក្រក់​បំផុត​ដែល​ប្រទេស​នេះ​មិន​ដែល​បាន​ជួបប្រទះក្នុងរយៈពេលជិត ២ ទសវត្សរ៍មកនេះ។

កាលពីដើមសប្តាហ៍នេះ រដ្ឋមន្ត្រីក្រសួងមហាផ្ទៃ លោក Gerard Darmanin បាននិយាយថា នគរបាលសរុប ១៣០,០០០នាក់ ត្រូវដាក់ពង្រាយនៅល្ងាចថ្ងៃទី ១៣ និង ទី១៤ ខែកក្កដា៕