មនុស្ស ៧នាក់បានស្លាប់ ៣នាក់ទៀត កំពុងបាត់ខ្លួន និងជាង ១.០០០នាក់ ត្រូវបានជម្លៀសចេញ ខណៈដែលភ្លៀងធ្លាក់ខ្លាំង រហូតដល់ថ្ងៃទី៣ បានធ្វើឲ្យមាន​ការខូចខាត​យ៉ាង​ធ្ងន់ធ្ងរ ក្នុងប្រទេសកូរ៉េខាងត្បូង នៅថ្ងៃសៅរ៍ (ទី១៥ ខែកក្កដា) នេះ ដោយ​បណ្តាល​ឲ្យ​មាន​ជា​បំណាក់​ដី និងកម្រិតទឹកឡើងខ្ពស់ជាងទំនប់។

យោងតាមក្រសួងមហាផ្ទៃ និងសុវត្ថិភាព បានឲ្យដឹងថា គិតត្រឹមម៉ោង ១១ព្រឹក (ម៉ោង ២:០០ ម៉ោងសកល) មនុស្សចំនួន ១,៥៦៧នាក់ ត្រូវបានជម្លៀស នៅទូទាំងប្រទេស ដោយ​បទ​បញ្ជា​ជម្លៀស​របស់រដ្ឋាភិបាល ក្នុងតំបន់ ក្ដោបលើចំនួនមនុស្សជាង៧.០០០នាក់ ក្នុងពេល​វេលា​ផ្សេងៗ​គ្នា។ ការជម្លៀសអាចមានបន្ថែមទៀត នៅពេលដែលទឹកបានហៀរទំនប់ នៅខេត្ត Chungcheong ​​ខាងជើង ដោយទំនប់ Goesan កំពុងបង្ហូរ​ទឹកចេ​ញ​យ៉ាង​ច្រើន​តាម​ដែល​អាច​ធ្វើបាន​។

ក្រុមហ៊ុន​ប្រតិបត្តិការរថភ្លើង Korea Railroad Corp បាននិយាយថា ខ្លួនកំពុងបញ្ឈប់​រថភ្លើង​ល្បឿនយឺ​ត​ទាំងអស់ និងរថភ្លើងល្បឿនលឿនមួយចំនួន ខណៈដែលរថភ្លើង​ល្បឿនលឿន​ផ្សេង​ទៀត​ អាចនឹងត្រូវពន្យារពេល ដោយសារប្រតិបត្តិការយឺត ខណៈដែលបំណាក់ដី ការជន់លិចផ្លូវ និង​ការ​ធ្លាក់ដុំថ្ម បានគំរាមកំហែងដល់សុវត្ថិភាពធ្វើដំណើរ។

ក្នុងកិច្ចប្រជុំជាមួយទីភ្នាក់ងាររដ្ឋាភិបាល នាថ្ងៃសៅរ៍នេះ នាយករដ្ឋមន្ត្រី លោក Han Duck-soo បានអំពាវនាវឲ្យយោធាចូលរួមយ៉ាងសកម្ម ក្នុងសកម្មភាពជួយសង្គ្រោះ ដោយធ្វើ​ការ​ជាមួយ​មន្ត្រី​រដ្ឋាភិបាល ដើម្បីប្រមូលឧបករណ៍ និងកម្លាំងពលកម្ម៕