នគរបាលបាននិយាយកាលពីថ្ងៃសុក្រ (ទី១៤ កក្កដា) ថា ជនសង្ស័យម្នាក់ ត្រូវបាន​ចាប់ខ្លួន​ពាក់ព័ន្ធ​នឹងការសម្លាប់ជាបន្តបន្ទាប់ នៅទីក្រុងញូវយ៉ក សហរដ្ឋអាមេរិក កាលពីជាង ១​ទស្សវត្សរ៍​មុន ដែលបានកំណត់គោលដៅលើអ្នករកស៊ីផ្លូវភេទ និងអ្នកផ្សេងទៀត ដែល​សាកសព​របស់​ជន​រងគ្រោះ​ទាំង​នោះ ត្រូវបានចោលរាយប៉ាយតាមឆ្នេរសមុទ្រនៃកោះ Long Island ។

សាកសពមនុស្សចំនួន ១១នាក់ ត្រូវបានរកឃើញក្នុងឆ្នាំ២០១០ និងឆ្នាំ២០១១ នៅតាម​បណ្តោយ​ឆ្នេរ Gilgo Beach ដាច់ស្រយាល នៅលើកោះរបាំងមហាអាត្លង់ទិក ចម្ងាយប្រហែល ៤០​ម៉ាយល៍ (៦៤គីឡូម៉ែត្រ) ភាគខាងកើតទីក្រុងញូវយ៉ក។ ការសម្លាប់នេះ បាន​ទាក់​ទាញ​ការ​ចាប់​អារម្មណ៍ នៅទូទាំងប្រទេសនេះ។

ស្នងការនគរបាលតំបន់ Suffolk លោក Rodney Harrison បាននិយាយថា ជន​សង្ស័យ​ប្រុស​ម្នាក់ ត្រូវបានចាប់ខ្លួន នៅវេលាម៉ោង ៨ និង៣០នាទីយប់ថ្ងៃព្រហស្បតិ៍ (ទី១៣ ខែកក្កដា)។ លោក​មិន​បានបង្ហាញអត្តសញ្ញាណជនសង្ស័យនោះទេ ប៉ុន្តែបានប្រាប់ថា គណៈវិនិច្ឆ័យធំ ត្រូវ​បាន​រំពឹង​ថា នឹងចេញដីកានៅរសៀលថ្ងៃសុក្រ (ទី១៤ ខែកក្កដា)។

តែដោយដកស្រង់សម្ដីពីមន្ត្រីអនុវត្តច្បាប់ ៤នាក់ ប្រព័ន្ធផ្សព្វផ្សាយ NBC បាន​កំណត់​អត្ត​សញ្ញាណ​ជន​សង្ស័យនោះថា ឈ្មោះ Rex Heuermann ( ហូយអើម៉ិន)ដែលជាស្ថាបត្យករវ័យ ៥៩ឆ្នាំ មកពីសង្កាត់តូចមួយ Massapequa (ម៉ាសបាពីក្វា)។ សារព័តមាន New York Times ដែល​យោងតាមសម្ដីពីមន្ត្រីមិនបញ្ចេញឈ្មោះម្នាក់ ក៏បានផ្សាយពីជនសង្ស័យថា ឈ្មោះ Heuermann ដូចគ្នាដែរ៕