ក្រសួងការបរទេសអាមេរិក បានឲ្យដឹងថា រដ្ឋមន្ត្រីការបរទេសអាមេរិក លោក Antony Blinken និង​រដ្ឋមន្ត្រីការបរទេសអារ៉ាប៊ីសាអ៊ូឌីត ព្រះអង្គម្ចាស់ Faisal bin Farhan បានបញ្ជាក់​ពី​ការ​ប្តេជ្ញា​ចិត្ត​រួមគ្នា ដើម្បីបញ្ចប់ជម្លោះ ក្នុងប្រទេសស៊ូដង់ និងឆ្លើយតបចំពោះតម្រូវការមនុស្សធម៌ អំឡុង​ការ​អំពាវនាវ កាលពីថ្ងៃសុក្រ (ទី១៤ ខែកក្កដា)។

ការប្រយុទ្ធគ្នាដែលបានផ្ទុះឡើង កាលពីថ្ងៃទី១៥ ខែមេសា បានធ្វើឲ្យជន​ស៊ីវិល​ចាកចេញ​ពី​តំបន់​រដ្ឋធានី​ធំៗ ដែលរួមមានទីក្រុងខាទូម (Khartoum) បារិ (Bahri) និងអ៊ុដឺមែន (Omdurman) ហើយបានបង្កឲ្យមានការវាយប្រហារដែលជម្រុញដោយជនជាតិភាគតិច នៅតំបន់ដាហ្វួរ (Darfur)​។

កងកម្លាំងគាំទ្ររហ័សរបស់ស៊ូដង់ (RSF) បានប្រយុទ្ធជាមួយកងទ័ពរដ្ឋភិបាលស៊ូដង់ អស់​រយៈ​ពេលបី​ខែ ដោយបានត្រួតត្រារដ្ឋធានីស៊ូដង់ដោយជាក់ស្ដែង ហើយប្រជាពលរដ្ឋ ចោទថា ក្រុម​កង​កម្លាំង​នេះ បានចូលឆក់ប្លន់ និងកាន់កាប់លំនៅឋានរបស់ពួកគេ។

ទោះបីជាមានកិច្ចប្រឹងប្រែងសម្រុះសម្រួល ទាំងក្នុងតំបន់ និងអន្តរជាតិ​រហូត​មក​ដល់​ពេល​នេះ​ក៏​ដោយ ក៏មិនមានកិច្ចព្រមព្រៀងណាមួយកើតឡើង ដើម្បីបញ្ចប់សង្គ្រាមនេះទាំងស្រុងបានដែរ។

អ្នកនាំពាក្យក្រសួងការបរទេសអាមេរិក លោក Matthew Miller បាននិយាយកាលពីថ្ងៃសុក្រថា រដ្ឋ​មន្ត្រីការបរទេសសហរដ្ឋអាមេរិក លោក Blinken បាន​ជជែក​គ្នា​តាម​ទូរស័ព្ទ​ជាមួយ​រដ្ឋ​មន្ត្រី​ការបរទេស​អារ៉ាប៊ីសាអ៊ូឌីត ព្រះអង្គម្ចាស់ Bin Farhan ដើម្បីពិភាក្សាអំពី​បញ្ហា​ជា​ច្រើន​ទាំង​ទ្វេ​ភាគី និងក្នុងតំបន់ ដូចជាជម្លោះ នៅក្នុងប្រទេសស៊ូដង់នេះជាដើម ដោយបញ្ជាក់បន្ថែមថា រដ្ឋមន្ត្រី​ការ​បរទេស​ទាំង២ នឹងរិះរកគ្រប់វិធី ដើម្បីបញ្ចប់ជម្លោះនេះ។

យោងតាមអង្គការសហប្រជាជាតិ បានឲ្យដឹងថា មនុស្សរាប់រយនាក់ បានស្លាប់ដោយសារ​អំពើ​ហិង្សា និងរាប់លាននាក់ទៀត ត្រូវផ្លាស់ប្ដូរលំនៅឋាន ពីកន្លែងមួយ ទៅកន្លែងមួយ ក្នុងប្រទេស​របស់​ខ្លួន ក្នុងនោះរួមទាំងចំនួនជិត ៧០០.០០០នាក់ ដែលបានភៀសខ្លួនចេញពីប្រទេស៕