តំបន់ជាច្រើននៅភាគខាងលិច នៃសហរដ្ឋអាមេរិក ត្រូវបានគេរំពឹងថា នឹងទប់ទល់​នឹង​ការ​ឡើង​កម្ដៅ​ក្ដៅ​ជាង​គេបំផុតលើផែនដី ខណៈដែលរលក​កម្ដៅដ៏គ្រោះថ្នាក់ នៅតែ​បន្ត​វាយ​ប្រហារ​ភាគ​ខាង​លិច និងភាគខាងត្បូង នៃប្រទេសនេះ។

បើយោងតាមសេវាអាកាសធាតុជាតិសហរដ្ឋអាមេរិក(NWS) បានឲ្យដឹងថា ចន្លោះថ្ងៃសៅរ៍ និ​ង​ថ្ងៃ​អាទិត្យមានការព្យាករណ៍ពីសីតុណ្ហភាព ដែលឡើងខ្ពស់ដល់ ៤៥អង្សាសេ នៅរដ្ឋកាលីហ្វ័រញ៉ា ណេវ៉ាដាអារីហ្សូណា តិចសាស់ ផ្លរីដា អូរីហ្គិន និងអៃដាហូ។

កម្ដៅអាចឡើងដល់៥៤,៤អង្សាសេ នៅផ្នែកខ្លះនៃរដ្ឋអារីហ្សូណា និងណេវ៉ាដា ដោយ​អ្នក​ព្យាករណ៍បានព្រមានអំពីលទ្ធភាពនៃការឡើងក្ដៅខ្លាំងឡើងៗគ្រប់ពេលវេលា ទាំងនៅទីក្រុង Phoenix និង Las Vegas ដែលទីក្រុងទាំងពីរនេះ ស្ថិតនៅ​ក្រោម​ការ​ព្រមាន​អំពី​ការ​ឡើង​កម្ដៅ​ខ្លាំង​បំផុត​។

បើយោងតាមNWS បានឲ្យដឹងថា សីតុណ្ហភាពឡើងក្ដៅខ្លាំងនេះ គឺដោយសារតែ «តំបន់​កម្រិត​ខ្ពស់​មាន​សម្ពាធ​ខ្ពស់» នៅភាគនិរតីដែលត្រៀមឡើងកាន់តែខ្ពស់ឡើងៗ៕