នាយករដ្ឋមន្ត្រីអ៊ីរ៉ាក់ លោក Mohammed Shia al-Sudani បានសន្ទនា​តាមទូរស័ព្ទ​ជាមួយ​ប្រធានាធិបតី​ទួរគី​លោក Recep Tayyip Erdogan កាលពីថ្ងៃសុក្រ (ទី១៤ ខែកក្កដា) ដើម្បី​ពិភាក្សា​ពី​ទំនាក់ទំនងទ្វេភាគី និងការកសាងផ្លូវតភ្ជាប់ រវាងប្រទេសទាំងពីរ។

សេចក្តីថ្លែងការណ៍ដែលចេញដោយការិយាល័យរបស់លោកនាយករដ្ឋមន្ត្រីអ៊ីរ៉ាក់ បានឲ្យដឹងថា នៅ​ក្នុង​កិច្ចពិភាក្សាតាមទូរស័ព្ទនោះ លោក al-Sudani បានសង្កត់ធ្ងន់ថា៖ «ប្រទេសអ៊ីរ៉ាក់ យក​ចិត្ត​ទុក​ដាក់យ៉ាងខ្លាំង ក្នុងការកសាងភាពជាដៃគូ ទាំងក្នុងតំបន់ និងអន្តរជាតិ ដែលរួម​ចំណែក​ដល់​ការ​អភិវឌ្ឍសេដ្ឋកិច្ចជាតិនៃប្រទេសជាបងប្អូន និងជាមិត្ត»។

ចំណែកឯលោក Erdogan បានបង្ហាញពីការត្រៀមខ្លួនរួចជាស្រេចរបស់ក្រុមហ៊ុននៃប្រទេសទួរគី ដើម្បី​ធ្វើការលើគម្រោងផ្លូវអភិវឌ្ឍន៍ ដែលជាច្រករបៀងដឹកជញ្ជូន លាតសន្ធឹងពីខេត្ត Basra ភាគ​ខាង​ត្បូង​អ៊ីរ៉ាក់ទៅកាន់ព្រំដែនទួរគី ដើម្បីបម្រើដល់ផលប្រយោជន៍របស់ប្រជាជន ក្នុងតំបន់។

គម្រោងផ្លូវអភិវឌ្ឍន៍នេះ គឺជាគម្រោងហេដ្ឋារចនាសម្ព័ន្ធដ៏ធំដែលស្នើឡើងដោយរដ្ឋាភិបាលអ៊ីរ៉ាក់ ក្នុង​ខែ​ឧសភា។ គម្រោងនេះមានគោលបំណងភ្ជាប់ភាគខាងត្បូងអ៊ីរ៉ាក់ ទៅកាន់​ព្រំដែន​ជាមួយ​ទួរគី ដែលផ្លូវនេះ នឹងតភ្ជាប់ទៅកាន់បណ្តាញផ្លូវដែក និងផ្លូវថ្នល់របស់តំបន់អឺរ៉ុប៕