យោងតាមមូលនិធិកុមារអន្តរជាតិរបស់អង្គការសហប្រជាជាតិ (UNICEF) បានឲ្យដឹងថា រហូត​មក​ដល់​ពេលនេះ នៅឆ្នាំនេះ កុមារប្រហែល ១១នាក់បានស្លាប់ ឬបាត់ខ្លួន​ក្នុង​សមុទ្រ​ជា​រៀង​រាល់​សប្តាហ៍ នៅពេលដែលព្យាយាមឆ្លងកាត់ផ្លូវមេឌីទែរ៉ាណេកណ្តាលទៅកាន់ទ្វីបអឺរ៉ុប។

UNICEF ប៉ាន់ប្រមាណក្នុងទិន្នន័យចុងក្រោយរបស់ខ្លួនថា ចាប់តាំងពីឆ្នាំ២០១៨ មក កុមារ​ប្រហែល ១.៥០០នាក់ បានបាត់បង់ជីវិត ឬបាត់ខ្លួន ក្នុងពេលធ្វើដំណើរដ៏គ្រោះថ្នាក់នេះ។ តួ​លេខ​ទាំង​នេះមិនរាប់បញ្ចូលទាំងស្ថានភាព ដែលទូកខ្លះ បានបាត់ដំណឹង នៅសមុទ្រ ដោយ​គ្មាន​បន្សល់​អ្នករស់រានមានជីវិតសូម្បីម្នាក់ ឬបន្សល់ទុកនូវការកត់ត្រានោះផង ដែលមានន័យថា ចំនួន​ពិត​ប្រាកដប្រហែលជាខ្ពស់ជាងនេះច្រើន។

ក្នុងសេចក្តីថ្លែងការណ៍មួយ នាយកប្រតិបត្តិអង្គការ UNICEF លោកស្រី Catherine Russell បាននិយាយថា៖ «ដោយការប៉ុនប៉ងស្វែងរកកន្លែងសុវត្ថិភាព ជួបជុំជាមួយគ្រួសារ និង​ស្វែង​រក​អនាគត​ដែល​ផ្ដល់ក្ដីសង្ឃឹមជាងនេះ កុមារជាច្រើននាក់ កំពុងឡើង​ជិះ​ទូក​នៅ​ក្នុង​សមុទ្រ​មេឌីទែរ៉ាណេ ហើយបញ្ចប់ជីវិតរបស់ពួកគេ ឬបាត់ខ្លួន»។

ប្រទេសអ៊ីតាលី គឺជាកន្លែងឈប់សំចតចម្បងនៅអឺរ៉ុប សម្រាប់ជនអន្តោប្រវេសន៍ ដែល​កំពុង​ស្វែង​រក​ការ​ទទួលបានសិទ្ធិជាជនភៀសខ្លួន នៅអឺរ៉ុប។ អង្គការ UNICEF បានបន្ថែមថា ចំនួន​បាន​កើន​ឡើង ដោយកត់សម្គាល់ថា កុមារចំណាកស្រុកប្រហែល ១១.៦០០នាក់ ដែល​ភាគ​ច្រើន​ធ្វើ​ដំណើរ​តែ​ម្នាក់​ឯង បានចុះចតនៅឆ្នេរសមុទ្រអ៊ីតាលីរហូតមកដល់ពេលនេះ ដោយមាន​ចំនួន​ច្រើន​ជាង​ប្រហែល ២ដង ក្នុងពាក់កណ្តាលឆ្នាំ២០២២៕