ធនធានមនុស្ស គឺជាទ្រព្យសកម្មរបស់ជាតិ ជាកត្តាកំណត់ និងជា​មធ្យោបាយ​គន្លឹះ​ សម្រាប់​គ្រប់​ដំណើរ​ការ នៃការអភិវឌ្ឍសេដ្ឋកិច្ច និងសង្គម ប្រសិនមានធនធានមនុស្សសម្បូរបែប គឺ​ជា​បុរេ​លក្ខខណ្ឌ​ចាំបាច់ ដើម្បីកំណត់ជោគជ័យជូនជាតិ។

ឯកឧត្តម ជា ចាន់តូ ទេសាភិបាលធនាគារជាតិនៃកម្ពុជា ថ្លែងលើកនៅក្នុងពិធីប្រគល់សញ្ញាបត្រ ជូន​និស្សិតជ័យលាភីថ្នាក់ប្រកាសនីយបត្រជាន់ខ្ពស់បច្ចេកទេសធនាគារ ជំនាន់ទី២៦ ទី២៧ ទី​២៨ និងទី២៩ នៃមណ្ឌលសិក្សាបច្ចេកទេសធនាគារ នៅថ្ងៃទី ១៥ ខែ កក្កដា ឆ្នាំ ២០២៣ នេះ​ថា រាជរដ្ឋាភិបាលបានកំណត់ថា ការអភិវឌ្ឍធនធានមនុស្ស ជា​គោល​នយោបាយ​យុទ្ធសាស្រ្ត​រយៈ​ពេល​វែង, ធនធានមនុស្ស គឺជាទ្រព្យសកម្មរបស់ជាតិ ជាកត្តា​កំណត់​ និង​ជា​មធ្យោបាយ​គន្លឹះ​ សម្រាប់​គ្រប់​ដំណើរការ ការអភិវឌ្ឍសេដ្ឋកិច្ច និងសង្គម ព្រោះថាគ្រប់អ្វីៗទាំងអស់ នឹង​មិន​អាច​ដំណើរ​ការ​បានប្រកបដោយគុណភាព ប្រសិទ្ធផល និងប្រសិទ្ធភាពនោះឡើយ បើពុំ​មាន​ធន​ធាន​មនុស្ស​ដែល​មានគុណវឌ្ឍិខ្ពស់ ជំនាញរឹង និងទន់ ចំណេះដឹងផ្នែកវិទ្យាសាស្រ្ត និងបច្ចេកវិទ្យា និង​កិច្ច​ខិតខំប្រឹងប្រែងអនុវត្តការងារដោយប្រកាន់ខ្ជាប់នូវក្រមសីលធម៌វិជ្ជាជីវៈ ។

ឯកឧត្តម បន្តថា ជាមួយនិងការរីកចម្រើននៃវិស័យធនាគារនៅកម្ពុជា បច្ចុប្បន្នបានផ្សារភ្ជាប់ និង​តម្រូវ​ការ​មូលធនមនុស្ស និងការបណ្ដុះបណ្ដាលធនធានមនុស្សឱ្យមានចំណេះដឹង មាន​សមត្ថភាព​ខ្ពស់​ភាពច្នៃប្រឌិត សហគ្រិនភាព នវានុវត្តន៍ និងមានក្រមសីលធម៌វិជ្ជាជីវៈខ្ពស់ គឺ​ដើម្បី​គាំទ្រ​ដំណើរការអភិវឌ្ឍសេដ្ឋកិច្ច និងសង្គមជាតិ ។ ក្នុងន័យនេះ ការអប់រំ​ក្នុង​គោល​ដៅ​ សម្រាប់​ឆ្នាំ២០៣០ ត្រូវផ្ដោតសំខាន់លើការផ្ដល់សេវាប្រកបដោយគុណភាព សមធម៌ និង​បរិយាបន្ន​នៅ​គ្រប់កម្រិតសិក្សា រួមទាំងការអប់រំបច្ចេកទេស និងជំនាញវិជ្ជាជីវៈ ជាពិសេស​ការ​សិក្សា​ពេញ​មួយជីវិត ដើម្បីបង្កើនប្រសិទ្ធភាព ផលិតភាពការងារ ស្របតាម​យុគសម័យ​ឈាន​មុខ​ដោយ​បច្ចេកវិទ្យាសម្រាប់គាំទ្រកំណើនសេដ្ឋកិច្ច ភាពសុខុដុមជីវិតបុគ្គល និងវិបុល​ភាព​នៃ​សេដ្ឋកិច្ច​-សង្គមជាតិយើង ។

ឯកឧត្តម ជា ចាន់តូ បន្តលើកឡើងថា ជុំវិញការសិក្សានេះ បច្ចុប្បន្ន​កម្ម​គោល​នយោបាយ​អប់រំ​ជាតិ និងការធ្វើកំណែទម្រង់កម្មវិធីសិក្សាបុរេសកម្ម សំដៅ​អភិវឌ្ឍន៍​យុវជន​កម្ពុជា​យើង​ឱ្យ​មាន​សមត្ថភាព និងជំនាញវិជ្ជាជីវៈខ្ពស់ឱ្យឆ្លើយតបនឹងតម្រូវការនៃការងារ និង​ដំណាក់​កាល​រីក​ចម្រើន​នៃ​សេដ្ឋកិច្ច និងសង្គមជាតិ ដែល​ប្រទេស​យើង​កំពុង​សម្រប​ខ្លួន​ចាប់​យក​កាលានុវត្តភាព នៃ​ការ​រីក​ចម្រើ​ន​ឥត​ឈប់ឈរ ផ្នែកវិទ្យាសាស្រ្ត និងបច្ចេកវិទ្យា, ដូច្នេះធនធានយុវជន ក្រៅពី​មាន​កម្លាំង​ពលំ​មាំមួន ត្រូវមានប្រាជ្ញាជាពុទ្ធិ ដើម្បីធ្វើជាពលរដ្ឋល្អចូលរួមក្នុងសកម្មភាពមនុស្សធម៌ កិច្ច​ការ​សង្គម សេដ្ឋកិច្ច និងត្រូវបណ្ដុះមនសិការស្នេហាជាតិចំពោះមាតុភូមិរបស់ខ្លួន ប្រកបស្មារតីបរិសុទ្ធ មាន​សមត្ថភាព មានគុណធម៌ និងមានឆន្ទៈមោះមុត និងការ​ថែរក្សា​សន្តិភាព​ឲ្យ​បាន​គង់​វង្ស​ជា​រៀង​ដរាប។

សូមបញ្ជាក់ថា នៅក្នុងពិធីប្រគល់សញ្ញាបត្រនេះ និស្សិតចំនួន ៤៥០ រូប ដែល​បាន​បញ្ចប់​ការ​សិក្សា​នៅ​មណ្ឌលសិក្សាបច្ចេកទេស ទទួលបានថ្នាក់​ប្រកាស​នីយបត្រ​ជាន់ខ្ពស់​បច្ចេក​ទេស​ធនាគារ ក្នុងនោះនិស្សិតជំនាន់ទី ២៦ មាន ៦៧ រូប, និស្សិតជំនាន់ទី ២៧ មាន ១០៤ រូប, និស្សិត​ជំនាន់ទី ២៨ មាន ១១៩ រូប និងនិស្សិតបញ្ចប់នៅជំនាន់ទី ២៩ មានចំនួន ១២២ រូបផងដែរ៕ អត្ថបទ៖ សុន រ៉ាឌី