កំពង់ឆ្នាំង ៖ គណៈកម្មការរៀបចំការបោះឆ្នោតខេត្តកំពង់ឆ្នាំងនៅថ្ងៃទី១៥ ខែកក្កដា ឆ្នាំ​២០២៣​នេះ បានរៀបចំបើកវគ្គបណ្តុះបណ្តាលស្តីពីការបោះឆ្នោត រាប់សន្លឹកឆ្នោត និង​ប្រកាស​លទ្ធផល​បោះឆ្នោត សម្រាប់ការបោះឆ្នោតជ្រើសតាំងតំណាងរាស្រ្ត នីតិកាលទី៧ ឆ្នាំ២០២៣ ដល់ ប្រធាន និងសមាជិកអប់រំ នៃគណៈកម្មការរៀបចំការបោះឆ្នោតឃុំ ។

វគ្គបណ្តុះបណ្តាលនាពេលនេះត្រូវបានបណ្តុះបណ្តាលដល់អ្នកដែលមានភារកិច្ចត្រូវអនុវត្តការងារ និង​ផ្តល់ការបណ្តុះបណ្តាលបន្ត នៅតាមឃុំសង្កាត់ នាពេលខាងមុខ ព្រមទាំង​ជូន​តំណាង​គណបក្ស​នយោបាយ​ឈរឈ្មោះបោះឆ្នោត តំណាងសមាគម និងអង្គការ និងអាជ្ញាធរពាក់ព័ន្ធ ដើម្បី​ត្រៀមចូលរួម និងសហការអនុវត្តតាមភារកិច្ចរៀងៗខ្លួន សំដៅជំរុញ និងធានាឱ្យ​ដំណើរ​ការ​បោះឆ្នោត​នា​ពេលខាងមុខទទួលបានជោគជ័យ គោរពតាមច្បាប់ បទបញ្ជា និងនីតិវិធី នៃ​ការ​បោះឆ្នោត ក្នុងបរិយាកាសល្អទាំងមុនពេល ក្នុងពេល និងក្រោយពេលបោះឆ្នោត ។

 វគ្គបណ្តុះបណ្តាលនេះមានគ្រូឧទេ្ទសចំនួន៤នាក់ ធ្វើបទបង្ហាញតាមជំនាញ នីមួយៗដល់ គ្រូ​បង្គោល ទាំង៩៥នាក់ ដែលមកពីស្រុកកំពង់ត្រឡាច ស្រុកបរិបូរណ៍ និង ស្រុករលាប្អៀរ ។

គួរបញ្ជាក់ថា ការបោះឆ្នោតជ្រើសតាំងតំណាងរស្រ្តនីតិកាលទី៧ ឆ្នាំ២០២៣នេះ នឹង​ប្រព្រឹត្តិ​នៅ​ថ្ងៃទី​២៣ ខែកក្កដា ឆ្នាំ២០២៣ ដែលនឹងដំណើរកាចាប់ពីម៉ោង៧ព្រឹក រហូតដល់ម៉ោង៣រសៀល ។ សម្រាប់នៅខេត្តកំពង់ឆ្នាំង មានការិយាល័យបោះឆ្នោតចំនួន៨១៨ការិយាល័យ មាន​គណបក្ស​នយោបាយ ដែលបានចូលរួមឈឈ្មោះនៅមណ្ឌលខេត្តកំពង់ឆ្នាំង មានចំនួន១៤គណបក្ស ផងដែរ​៕ អត្ថបទ៖ ហុងវាស្នា