ឧត្តរមានជ័យ៖ នៅថ្ងៃទី១៦ ខែកក្កដា ឆ្នាំ២០២៣ ឯកឧត្តម គន់ គីម សមាជិក​អចិន្រ្តៃយ៍ នៃគណៈកម្មាធិការកណ្តាលគណបក្សប្រជាជនកម្ពុជា និងជា​ប្រធាន​ក្រុមការងារ​គណបក្ស​ចុះមូលដ្ឋាន​ខេត្តឧត្តរមានជ័យ បានដឹកនាំក្រុមការងារសមាជិក-សមាជិកា គណបក្ស​ជួប​សំណេះសំណាល​ជាមួយប្រជាពលរដ្ឋ និងបង្រៀនគូសសន្លឹកឆ្នោត ស្ថិតក្នុងក្រុងសំរោង។

ក្នុងពេលសំណេះសំណាល និងបង្រៀនប្រជាពលដ្ឋគូសសន្លឹកឆ្នោត ឯកឧត្តម គន់ គីម បាន​អំពាវ​នាវ​ដល់ប្រជាពលរដ្ឋដែលមានឈ្មោះក្នុងបញ្ជីបោះឆ្នោតទាំងអស់ បន្ត​បោះឆ្នោត​ជូន​គណបក្ស​ប្រជាជនកម្ពុជា ដើម្បីរក្សាសុខសន្តិភាព ការអភិវឌ្ឍប្រទេសជាតិ និង​បន្ត​ភាព​រីក​ចម្រើន​បន្ត​ទៀត។

ឯកឧត្តម គន់ គីម បានរម្លឹកពីគុណបំណាច់របស់គណបក្សប្រជាជនកម្ពុជា ក្នុងការជួយ​សង្រ្គោះ​ប្រជាជន​ចេញ​ពី​របបប្រល័យពូជសាសន៍ ប៉ុល ពត, ជាពិសេសនយោបាយ ឈ្នះ ឈ្នះ ដែល​ធ្វើ​ឱ្យ​ប្រទេស​​កម្ពុ​ជា​មានលទ្ធិប្រជាធិបតេយ្យ សេរីពហុបក្ស ការបង្រួបបង្រួមជាតិ ផ្សះផ្សាជាតិ រហូត​ទទួល​បាន​សុខសន្តិភាពពេញលេញ ក្រោមការដឹកនាំប្រកបដោយគតិបណ្ឌិតរបស់ សម្តេចតេជោ​នាយករដ្ឋ​មន្រ្តី ព្រមទាំងទទួលបានសមិទ្ធផល និងភាពជោគជ័យជាច្រើន រួមមាន៖ ផ្លូវ ស្ពាន ប្រព័ន្ធ​ធារា​សាស្ត្រ បណ្ដាញទឹកស្អាត អណ្ដូងទឹក ភ្លើងអគ្គិសនី មន្ទីរពេទ្យ និងវត្តអារាម។

លើសពីនេះ ឯកឧត្តម បញ្ជាក់ថា សមិទ្ធផលទាំងនេះ សុទ្ធតែបានមកពីផ្លែផ្កានៃសន្តិភាព ដោយ​ការ​យក​អាយុ​ជីវិត​ធ្វើជាដើមទុន និងពលិកម្មដ៏ធំធេងរបស់សមាជិក សមាជិកា​គណបក្ស​ប្រជាជន​កម្ពុជា ក្រោមការដឹកនាំរបស់សម្តេចតេជោ ហ៊ុន សែន ប្រធានគណបក្ស៕