សហភាពអឺរ៉ុបបានជំរុញឱ្យប្រទេសអាស៊ែបៃហ្សង់ និងអាមេនី បញ្ឈប់ "អំពើហិង្សា និង​វោហា​សាស្ត្រ​ដ៏​ឃោរឃៅ" កាលពីថ្ងៃសៅរ៍ (១៥ កក្កដា) នៅជុំចុងក្រោយ នៃ​កិច្ច​ចរចា​នៅ​ក្នុង​ដំណើរ​ការ​សន្តិភាពដ៏លំបាកមួយ ដែលរុស្ស៊ីក៏កំពុងជំរុញឱ្យរក្សាតួនាទីដឹកនាំផងដែរ។

ប្រធាន​ក្រុម​ប្រឹក្សាសហភាពអឺរ៉ុប លោក Charles Michel (ឆាល មីឆែល) បានជួប​ប្រធានាធិបតី​អាស៊ែបៃហ្សង់ លោក Ilham Aliyev (អ៊លហាំ អាលីយ៉េវ) និងនាយករដ្ឋ​មន្ត្រី​អាមេនី លោក Nikol Pashinyan ( នីកូល ប៉ាស៊ីយ៉ាន់) សម្រាប់​កិច្ច​ពិភាក្សា​នៅ​ទីក្រុង​ព្រុច​ស៊ែល ប្រទេសប៊ែលហ្សិក ក្នុងគោលបំណងបញ្ឈប់អរិភាពដែលមានមកជាងបីទសវត្សរ៍នេះ។

ចាប់តាំងពីការដួលរលំនៃសហភាពសូវៀត ប្រទេសទាំងពីរបានប្រយុទ្ធគ្នាពីរលើកជុំវិញបញ្ហាតំបន់ Nagorno-Karabakh (ណាហ្គ័រណូ-ការ៉ាបាក់) ដែល​ជា​តំបន់​ភ្នំ​តូច​មួយ​ជា​ផ្នែក​មួយ​នៃ​ប្រទេស​អាស៊ែ​បៃហ្សង់ ប៉ុន្តែមានប្រជាជនជនជាតិអាមេនីប្រហែល ១២០.០០០នាក់រស់នៅទីនោះ។

រុស្ស៊ីបាននិយាយកាលពីថ្ងៃសៅរ៍ថា ខ្លួនបាន​ត្រៀម​ជា​ស្រេច​ក្នុង​ការ​រៀបចំ​កិច្ច​ប្រជុំ​បី​ផ្លូវ​ជាមួ​យ​អាមេនី និងអាស៊ែបៃហ្សង់ក្នុងកម្រិតថ្នាក់រដ្ឋមន្ត្រីការបរទេស។ ក្រសួងការបរទេសរុស្ស៊ីបាននិយាយនៅក្នុងសេចក្តីថ្លែងការណ៍មួយថា នេះអាច​ត្រូវ​បាន​តាម​ដាន​ជាមួយ​នឹង​កិច្ចប្រជុំកំពូលនៅទីក្រុងម៉ូស្គូ ដើម្បីចុះហត្ថលេខាលើសន្ធិសញ្ញាសន្តិភាព។

ប៉ុន្មាន​ម៉ោងបន្ទាប់ពីកិច្ចប្រជុំនៅទីក្រុងព្រុចស៊ែលមក ប្រទេស​អាស៊ែបៃហ្សង់​បាន​និយាយ​នៅ​ក្នុង​សេចក្តី​ថ្លែង​ការណ៍មួយនៅលើគេហទំព័រក្រសួងការបរទេសរបស់ខ្លួនថា រុស្ស៊ី និងអាមេនី មិន​បាន​បំពេញ​កិច្ចព្រមព្រៀងបទឈប់បាញ់ដែលរួមបញ្ចូលតំបន់ Nagorno-Karabakh ជាទឹក​ដី​ខ្លួន​វិញ​នោះ​ទេ៕​