កូដកម្មដ៏ធំក្នុងចំណោមបុគ្គលិកអាកាសយានដ្ឋាន និងក្រុមហ៊ុន​អាកាសចរណ៍​ក្នុង​ប្រទេស​អ៊ីតាលី​កាល​ពី​ថ្ងៃសៅរ៍ បានបញ្ឈប់ជើងហោះហើរប្រហែល១.០០០ជើង និងបានធ្វើ​ឱ្យ​ប៉ះពាល់​ដល់​ផែនការ​ធ្វើ​ដំណើររបស់អ្នកដំណើរជិត២៥០.០០០នាក់។ កម្មករដែលធ្វើកូដកម្មទាំងនោះទាមទារប្រាក់ខែខ្ពស់ និងការថែទាំសុខុមាលភាពកាន់តែប្រសើរ ដើម្បី​សម្រាលសម្ពាធជីវិតដែលបង្កឡើងដោយអតិផរណាខ្ពស់។

លោកស្រី Monica Mascia អគ្គលេខាធិការនៃសហព័ន្ធដឹកជញ្ចូនអ៊ីតាលី (FIT-CISL) បាន​និយាយ​ថា បុគ្គលិកនៃអាកាសយានដ្ឋានបានចូលរួមនៅក្នុងកូដកម្មនេះច្រើនបំផុត។ លោកស្រី Mascia បាននិយាយថា បុគ្គលិកអាកាសយានដ្ឋានសរុបចំនួន ១២.០០០នាក់ ត្រូវ​ការ​ការ​​កែ​សម្រួល​កិច្ច​សន្យាការងាររបស់ពួកគេឲ្យប្រសើរឡើងនៅទូទាំងប្រទេស។ កូដកម្ម​នេះ​ពាក់ព័ន្ធ​នឹង​អាកាស​យានដ្ឋានទាំងអស់នៅក្នុងប្រទេស។

កាលពីថ្ងៃសៅរ៍នៅឯអាកាសយានដ្ឋាន Da Vinci តែមួយ មានជើង​ហោះហើរ​ចំនួន​២០០​ជើង​ត្រូវ​បាន​លុប​ចោល។ ជើងហោះហើររាប់រយទៀតនៅព្រលានយន្តហោះសំខាន់ៗក្នុងទីក្រុងមីឡាន (Milan), ទីក្រុងវិននីស (Venice) និងទីក្រុងណាផល (Naples) ក៏ត្រូវបាន​លុប​ចោល​ផង​ដែរ​។ ដោយសារក្រុមហ៊ុនអាកាសចរណ៍បានជូនដំណឹងដល់អ្នកដំណើរអំពីការលុបចោលជើងហោះហើរជាច្រើនថ្ងៃជាមុននោះ មិន​មាន​អ្នក​ដំណើរ​ដែល​ជាប់​គាំង​ច្រើន​នៅ​អាកាស​យាន​ដ្ឋាន​ច្រើន​នោះ​ទេ​៕