ឧទ្យាន Death Valley ក្នុងរដ្ឋកាលីហ្វ័រនីញ៉ា បានឡើងកម្ដៅដល់កម្រិតខ្ពស់ប្រចាំថ្ងៃគឺ ១២៩​ហ្វារិនហៃ (៥៤អង្សាសេ) កាលពីថ្ងៃសៅរ៍ (១៥ កក្កដា) ហើយអ្នក​ទេសចរ​ជាច្រើន​ដែល​មក​ទស្សនា​ឧទ្យានជាតិសហរដ្ឋអាមេរិកមួយនេះបាននិយាយថា ពួកគេសង្ឃឹមថា​ខ្លួន​នឹងនៅជា​ផ្នែក​មួយ​នៃ​កម្ដៅបំ​បែកកំណត់ត្រាដែលអាចកើតមាននៅចុងសប្តាហ៍នេះ។

ក្រុម​អ្នក​ព្យាករណ៍បាននិយាយថា សីតុណ្ហភាពថ្ងៃអាទិត្យនេះនៅឧទ្យាន Death Valley ដែល​ជា​ទីក្តៅ​បំផុត​មួយនៅលើផែនដីក្នុងរដូវក្តៅ អាចកើនឡើងលើស ១៣០ហ្វារិនហៃ ដែល​បាន​កត់​ត្រា​ទុក​កាល​ពីឆ្នាំ២០២១។ កំណត់ត្រាកម្ដៅដែលមិនធ្លាប់មានរបស់ឧទ្យាននេះគឺកម្រិត ១៣៤​ហ្វារិនហៃ ដែលបានកត់ត្រាទុកកាលពីខែកក្កដា ឆ្នាំ១៩១៣ គឺជា​សីតុណ្ហភាព​ខ្ពស់​បំផុត​នៅ​ក្នុង​ពិភព​លោក​។

ខណៈដែលកម្តៅមិនផ្លូវការនៅខាងក្រៅមជ្ឈមណ្ឌលទស្សនាឧទ្យាន Death Valley នេះ​បាន​ឡើង​ដល់​១២៩​ហ្វារិនហៃ កម្ដៅដ៏ក្ដៅនោះបាន​ទាក់​ទាញ​ភ្ញៀវ​ទេសចរ​អន្តរជាតិ​ជា​ច្រើន​ដែល​អ្នក​ខ្លះ​ចាត់​ទុកថាជាបទពិសោធន៍ម្ដងក្នុងឆាកជីវិត។ លោក Andy ដែលជាភ្ញៀវទេសចរ​ម្នាក់​បាន​និយាយ​ថា កម្ដៅដ៏ក្ដៅបំបែកកំណត់ត្រាកម្រិត១៣០ហ្វារិនហៃ គឺជាហេតុផល​តែមួយ​គត់​សម្រាប់​ដំណើរ​កម្សាន្ត​របស់លោកទៅទីនោះ ដោយលោកបន្ថែមថា "ទីនេះត្រូវបាន​ព្យាករណ៍ថា​នឹង​មាន​សីតុណ្ហភាព​ខ្ពស់​បំផុតចំនួន១៣១ហ្វារិនហៃ" ។ ប៉ុន្តែមិនមែន​អ្នក​ទេសចរ​ឧទ្យាន​នោះ​ទាំង​អស់​មាន​អារម្មណ៍​រំភើបចំពោះកម្ដៅដ៏ក្ដៅដែលអាចកើតមាននេះនោះទេ៕