លោក ហ្សាក់ ប៉ឺឡេ ឯកអគ្គរដ្ឋទូតបារាំងប្រចាំនៅកម្ពុជា បានថ្លែងកោត​សរសើរ​ចំពោះភាព​ជោគ​ជ័យ​ធំចំនួនពីរ​នៅប្រទេសកម្ពុជា គឺភាពជោគជ័យ នៃកិច្ចប្រជុំកំពូលអាស៊ានឆ្នាំ២០២២ និង​ព្រឹត្តិការណ៍​បើក​កីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣នេះ។

ថ្លែងក្នុងឱកាសទិវាបុណ្យជាតិបារាំង នាថ្ងៃទី១៤ ខែកក្កដា ឆ្នាំ២០២៣នេះ នៅ​ក្នុង​ស្ថានទូត​បារាំង​ប្រចាំ​នៅ​កម្ពុជា លោក ហ្សាក់ ប៉ឺឡេ បាន​បញ្ជាក់ថា​«ឆ្នាំ​កន្លង​ទៅជា​ឆ្នាំ​ពោរ​ពេញ​ដោយ​ព្រឹត្តិការណ៍​វិជ្ជមាន​ជាច្រើន។ សម្រាប់ប្រទេសកម្ពុជា តាមការយល់ឃើញជាទូទៅ ប្រទេស​នេះ​ទទួល​បាន​ជោគជ័យធំៗ​ចំនួន​ពីរ ពោលគឺការធ្វើជាប្រធានកិច្ចប្រជុំកំពូលអាស៊ាន ដែល​មាន​ការ​ចូលរួម​ពី​សំណាក់​មេដឹកនាំពិភពលោក និងការរៀបចំព្រឹត្តិការណ៍កីឡាស៊ីហ្គេមជាប្រវត្តិសាស្រ្ត និង​កីឡាអាស៊ានប៉ារាហ្គេមដែលជាពេលវេលានៃមោទនភាពជាតិ និងក្តីសោមនស្ស ដែលខ្លួន​ខ្ញុំ​ផ្ទាល់​អាច​សង្កេត​ឃើញក្នុងអំឡុងពិធីបើកព្រឹត្តិការណ៍ខាងលើ។ អត្តពលិក​ជា​ច្រើន​ដែល​មាន​សញ្ជាតិ​ខ្មែរ និងសញ្ជាតិបារាំងបានឈ្នះមេដាយជាច្រើន»។

លោកឯកអគ្គរដ្ឋទូតបានលើកឡើងទៀតថា ការណ៍នេះ​បាន​បន្ថែម​វិស័យ​កីឡា​ចូល​ទៅ​ក្នុង​ភាព​សម្បូរបែប​នៃ​ទំនាក់ទំនងនៃប្រទេសយើងទាំងពីរ(កម្ពុជា-បារាំង)។ ក្នុងវិស័យកីឡានេះដែរ លោក​ក៏​មានសោមនស្សរីករាយ ដោយសារយុវជន យុវនារីកម្ពុជាចំនួន៩នាក់ ត្រូវបាន​ជ្រើស​រើស​ឱ្យ​ទៅ​បំពេញ​ការងារស្ម័គ្រចិត្តរយៈពេល៦ខែនៅប្រទេសបារាំង ដើម្បីចូលរួម​រៀប​ចំ​ព្រឹត្តិការណ៍​កីឡា​អូឡាំពិកដែលនឹងប្រព្រឹត្តទៅក្នុងឆ្នាំ២០២៤ នៅទីក្រុងប៉ារីស៍នាពេលខាងមុខនេះ។

ជា​មួយ​គ្នានោះដែរលោកឯកអគ្គរដ្ឋទូតក៏បានថ្លែងអំណរអគុណ ចំពោះ​រាជរដ្ឋាភិបាល​កម្ពុជា​ដែល​បាន​សម្រេច​សាង​សង់​វិមានរំឭកដល់អ្នកដែលទទួលអនិច្ចកម្មក្នុងសង្គ្រាមលោកលើកទី១ ឡើង​វិញ​ផង​ដែរ ដោយលោកបានចាត់ទុកថា ការដែលរាជរដ្ឋាភិបាលមានការផ្តួចផ្តើមគំនិត សាង​សង់​នូវ​វិមា​ននេះ​គឺប្រកបដោយសោមនស្សរីករាយ ដែលបង្ហាញថាទំនាក់ទំនងរវាងប្រទេសកម្ពុជា និង​បារាំង មិនត្រឹមតែមានតាំងពីយូរលង់ប៉ុណ្ណោះទេ ថែមទាំងជាទំនាក់ទំនងប្រកបដោយទំនុកចិត្ត និង​គ្មាន​ជម្លោះ​ដែល​បង្កឡើងដោយការចងចាំពីអតីតកាលថែមទៀតផង។ ក្នុងពេលដែលប្រទេសកម្ពុជា​កំពុងត្រៀមអបអរខួប៧០ឆ្នាំនៃឯករាជ្យ ដែលព្រះបរមរតនកោដ្ឋ​ទទួល​បាន​ប្រកប​ដោយ​អហិង្សា ពោលគឺមិនត្រឹម​តែ​មិ​ន​ប៉ះពាល់​ដល់​ទំនាក់​ទំនង​រវាង​ប្រទេស​យើង​ទាំង​ពីរ​នោះទេ ថែមទាំងបើកទៅកាន់សម័យកាលនៃកិច្ចសហប្រតិបត្តិការមិនធ្លាប់មាន ដែល​ក្នុងថ្ងៃនេះយើងទាំងអស់គ្នាជាអ្នកទទួលកេរមរតកនេះផង និងជាអ្នកបន្តវេនផង៕ អត្ថបទ៖ បាន ចក់