ឆ្នេរដ៏សំខាន់មួយនៅក្នុងខេត្តហ្វ៊ូគូស៊ីម៉ារបស់ប្រទេសជប៉ុន មានអ្នកមកទស្សនាតិចតួចប៉ុណ្ណោះនៅថ្ងៃដំណើរការដំបូង នៃអាជីវកម្មរបស់ខ្លួន សម្រាប់រដូវក្តៅកាលពីថ្ងៃសៅរ៍ ដោយសារតែមានការព្រួយបារម្ភអំពីគម្រោងបង្ហូរទឹកកខ្វក់ចេញពីរោងចក្រថាមពលនុយក្លេអ៊ែរ ហ្វ៊ូគូស៊ីម៉ា ដៃអ៊ិឈី ដែលបានរងខូចខាត ចូលទៅក្នុងសមុទ្រ។
ចម្ងាយបន្ទាត់ត្រង់រវាងឆ្នេរនោះនៅទីក្រុងអ៊ីវ៉ាគី (Iwaki) និងរោងចក្រថាមពលនុយក្លេអ៊ែរ ហ្វ៊ូគូស៊ីម៉ា ដៃអ៊ិឈី គឺប្រហែល ៤០គីឡូម៉ែត្រ។ វាគឺជាឆ្នេរមួយក្នុងចំណោមឆ្នេរចំនួន៤ នៅក្នុងទីក្រុងនេះ បើប្រៀបធៀបទៅនឹងឆ្នេរចំនួនប្រាំបួននៅទីក្រុងនេះ មុនពេលគ្រោះមហន្តរាយនុយក្លេអ៊ែរបានកើតឡើង។
ទោះបីជាផែនការរបស់ជប៉ុនក្នុងការបញ្ចេញចោលទឹកកខ្វក់នុយក្លេអ៊ែរចូលទៅក្នុងសមុទ្រមិនទាន់បានចាប់ផ្តើមក៏ដោយ ក៏អ្នកស្រុកនៅតែមានការរំខានជាមួយនឹងគម្រោងនោះដែរ។ ជាលទ្ធផល ឆ្នេរខ្សាច់ដ៏ធំល្វឹងល្វើយ នៃឆ្នេរនោះមានអ្នកទេសចរតិចតួចប៉ុណ្ណោះ។
មន្ត្រីម្នាក់នៅនាយកដ្ឋានទេសចរណ៍ទីក្រុងអ៊ីវ៉ាគី បាននិយាយនៅក្នុងបទសម្ភាសន៍តាមទូរស័ព្ទជាមួយទូរទស្សន៍កណ្តាលចិនថា មុនពេលគ្រោះមហន្តរាយនុយក្លេអ៊ែរ ឆ្នេរសមុទ្រនេះបានទទួលភ្ញៀវទេសចរជាង ៨០០.០០០នាក់រៀងរាល់រដូវក្តៅ ប៉ុន្តែកាលពីឆ្នាំមុនវាមានត្រឹមតែ ១២០ ០០០នាក់ ប៉ុណ្ណោះ តិចជាងមួយភាគប្រាំនៃចំនួនកាលពីមុន។
មន្ត្រីរូបនោះបានបន្ថែមថា ប្រសិនបើទឹកដែលបំពុលដោយនុយក្លេអ៊ែរត្រូវបានបង្ហូរទៅក្នុងសមុទ្រ វានឹងបង្កឱ្យមានការបំផ្លិចបំផ្លាញមួយទៀតដល់សេដ្ឋកិច្ចទេសចរណ៍ឆ្នេរក្នុងតំបន់មួយនេះផងដែរ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
