នគរបាលថៃបាននិយាយថា ជនសង្ស័យបួននាក់ដែលគេជឿថា ជាប់ពាក់ព័ន្ធ​នឹងឃាតកម្ម​លើ​ភ្នាក់ងារ​អចលនវត្ថុ​អាឡឺម៉ង់ម្នាក់ត្រូវបានចោទប្រកាន់ និងដាក់ក្នុងមន្ទីរឃុំឃាំងកាលពីថ្ងៃពុធ (១២ កក្កដា)​។

នគរបាលថៃបានធ្វើការឆ្មក់ចូលក្នុងក្លឹបរាត្រីមួយកាលពីថ្ងៃអង្គារ (១១ កក្កដា) ហើយ​បាន​ចាប់​ខ្លួន​ជន​សង្ស័យ​ម្នាក់​ក្នុងចំណោមជនសង្ស័យ។ នៅក្នុងការស៊ើបអង្កេតនោះ នគរបាលបាន​និយាយ​ថា ពួកគេបានរកឃើញភស្តុតាងដែលចង្អុលបង្ហាញទៅឃាតកម្មគិតទុកជាមុនលើលោក Hans Peter Mach វ័យ ៦២ឆ្នាំ ដែលបំណែក​សាកសព​ត្រូវ​បាន​គេ​រក​ឃើញ​នៅ​ក្នុង​ទូរ​ទឹក​កក​កាល​ពីថ្ងៃចន្ទ (១០ កក្កដា) ។

នគរបាលបានបន្ថែមថា ជនសង្ស័យបានជិះទូកល្បឿនលឿន ដើម្បីយក​សព​ទៅ​បោះចោល​ក្នុង​សមុទ្រ ហើយបច្ចុប្បន្នកំពុងប្រឈមនឹងការចោទប្រកាន់ពីបទប៉ុនប៉ងមនុស្សឃាត និង​លាក់​ទុក​សាកសព​ដោយចេតនា។

យោងតាមព័ត៌មានក្នុងស្រុក ជនសង្ស័យ៣នាក់ជាជនជាតិអាល្លឺម៉ង់ ខណៈម្នាក់ជាជនជាតិ​ប៉ាគីស្ថាន មានសញ្ជាតិថៃ។ ពួកគេទាំងអស់បានបដិសេធការចោទប្រកាន់នេះ។

អគ្គ​ស្នងការរងនគរបាលជាតិថៃ លោក Surachate Hakparn បាននិយាយកាលពីថ្ងៃសៅរ៍ (១៥ កក្កដា) ថា លោកបានបញ្ជាក្រុមនគរបាលរបស់លោកឱ្យចងក្រង និងផ្តល់​ព័ត៌​មាន​ពាក់ព័ន្ធ​ទាំងអស់​អំពី​ករណីនេះក្នុងរយៈពេលពីរសប្តាហ៍៕