សេវាសង្គ្រោះបន្ទាន់ Magen David Adom របស់អ៊ីស្រាអែលបាននិយាយថា ការបាញ់​ប្រហារ​នៅ​ក្បែរ​តំបន់​ទីលំនៅរបស់ជនជាតិជ្វីសនៅសហគមន៍ Tekoa ក្នុងតំបន់វេស ប៊ែង (West Bank) នៅ​ថ្ងៃអាទិត្យ (១៦ កក្កដា)នេះ បានធ្វើឱ្យជនជាតិអ៊ីស្រាអែល៣នាក់រងរបួស។

នៅ​ក្នុងសេចក្តីថ្លែងការណ៍មួយ ទីភ្នាក់ងារសង្រ្គោះនោះបានបន្ថែមថា ក្រុមគ្រូពេទ្យប៉ារ៉ារបស់ខ្លួន រួម​ជាមួយ​នឹងក្រុមពេទ្យយោធា បានព្យាបាលបុរសវ័យ៣០ឆ្នាំម្នាក់ក្នុងស្ថានភាពធ្ងន់ធ្ងរ ក្មេងស្រី​អាយុ ៩ឆ្នាំម្នាក់ និងក្មេងស្រីអាយុ១៤ឆ្នាំម្នាក់ ដោយ​ពួកគេទាំងពីរ​នោះ​នាក់​បាន​រងរបួស​ស្រាល​ដោយសារ​គ្រាប់​កាំភ្លើងនៅនឹងកន្លែង។ ក្រោយមក ពួកគេត្រូវបាន​ជម្លៀស​ទៅ​កាន់​មន្ទី​រ​ពេទ្យ​ក្រុង​ហ្សេរូសាឡឹម ដើម្បីទទួលការព្យាបាលបន្ថែម។

កិច្ចចរចា​សន្តិភាព​ដែល​សម្រប​សម្រួល​ដោយ​សហរដ្ឋ​អាមេរិក​ក្នុង​គោល​បំណង​បង្កើត​រដ្ឋ​ប៉ាឡេស្ទីន​ឯករាជ្យ​មួយនៅតំបន់វេស ប៊ែង ទីក្រុងហ្សេរូសាឡឹមភាគខាងលិច និងតំបន់កាហ្សា បាន​បរាជ័យនៅក្នុងឆ្នាំ ២០១៤ ហើយមិនមានសញ្ញានៃការដំណើរការឡើងវិញទេ។ អ៊ីស្រាអែល​បាន​ដណ្តើម​យកតំបន់ទាំងបីនោះនៅក្នុងសង្គ្រាមមជ្ឈិមបូព៌ាឆ្នាំ១៩៦៧។

អ៊ីស្រាអែល​បាន​ចាប់ផ្តើមប្រតិបត្តិការដ៏ធំបំផុតរបស់ខ្លួនក្នុងរយៈពេលជាច្រើនឆ្នាំនៅតំបន់វេស ប៊ែង កាលពីដើមខែកក្កដានៅក្នុងទីក្រុងជេនីន។ ជនជាតិប៉ាឡេស្ទីន១២នាក់ ដែលភាគ​ច្រើន​បញ្ជាក់​ថា​ ជា​យុទ្ធជនសកម្មប្រយុទ្ធ ត្រូវបានសម្លាប់ ក៏ដូចជាទាហានអ៊ីស្រាអែលម្នាក់ផងដែរ៕