គំនិតនៃការដាក់បញ្ចូលរូបយន្តទៅក្នុងជីវិតប្រចាំថ្ងៃប្រហែលជាធ្លាប់មាននៅក្នុងអាណាចក្រនៃរឿងប្រឌិតបែបវិទ្យាសាស្ត្រ ប៉ុន្តែនៅក្នុងអំឡុងពេលការរីកចម្រើននៃការអភិវឌ្ឍន៍ប្រព័ន្ធបច្ចេកវិទ្យាប្រាជ្ញាសិប្បនិមិត្ត (AI) ធ្វើឲ្យឧស្សាហកម្មរូបយន្តសេវាកម្មរបស់ប្រទេសចិនកំពុងរីកចម្រើន ខណៈដែលសហគ្រាសចិនបានបោះជំហានដ៏ធំក្នុងការច្នៃប្រឌិតគ្រឿងយន្តទាំងនោះ។

រូបយន្តបានក្លាយជាការចាប់អារម្មណ៍នៅក្នុងសន្និសីទប្រព័ន្ធបច្ចេកវិទ្យាប្រាជ្ញាសិប្បនិម្មិតពិភពលោក (WAIC) ដែលបានបញ្ចប់កាលពីដើមខែនេះក្នុងទីក្រុងសៀងហៃ ដោយអ្នកទស្សនាជាច្រើនមានការភ្ញាក់ផ្អើលជាមួយនឹងកិច្ចការដ៏ច្រើន ដែលរូបយន្តទាំងនោះអាចមានសមត្ថភាពធ្វើបាន។

ក្រុមហ៊ុនបច្ចេកវិទ្យាយក្សរបស់អាមេរិកឈ្មោះ តេស្លា បានដាក់បង្ហាញរូបយន្តឈ្មោះ "Optimus" របស់ខ្លួនក្នុងអំឡុងពេលពិព័រណ៍នៅឯសន្និសីទនោះ។ រូបយន្តកម្ពស់ ១,៨ម៉ែត្រនេះមានទម្ងន់ប្រហែល៥៧គីឡូក្រាម ហើយត្រូវបានបំពាក់ដោយបណ្តាញសរសៃប្រសាទដែលប្រើការមើលឃើញកុំព្យូទ័រដើម្បីស្វែងយល់ពីបរិយាកាសជុំវិញរបស់វា។ ថ្វីត្បិតតែរូបយន្តនោះមានរូបរាងតូចល្វត់ល្វន់ក៏ដោយ ប៉ុន្តែវាអាចលើកវត្ថុទម្ងន់កន្លះតោនបានយ៉ាងងាយស្រួល។

ជាមួយនឹងការអភិវឌ្ឍន៍រួមបញ្ចូលគ្នានៃបច្ចេកវិទ្យា AI និងប្រព័ន្ធទូរៈបញ្ជារូបយន្តជាច្រើនមានភាពឆ្លាតវៃជាងមុន ខណៈដែលឥឡូវនេះពួកវាអាចមានសម្ថភាពបង្កើនភាពបត់បែននៃផ្នែកមេកានិច ដោយធ្វើឱ្យរូបយន្តទាំងនោះមានដំណើរការរាងកាយកាន់តែងាយស្រួល ដែលនោះមានន័យថា ឧស្សាហកម្មរូបយន្តមានលក្ខណៈដូចមនុស្សកំពុងស្ថិតនៅក្រោមការយកចិត្តទុកដាក់យ៉ាងខ្លាំង៕